बाँके । गत आइतवार राती सडकको छेउमा हिडिरहेका तीन जना पैदलयात्रीलाई ठक्कर दिएर मार्ने कार चालकलाई कडा कारवाही र क्षतिपुर्तिको माग गर्दै मृतकका आफन्तले यहाँ आन्दोलन शुरु गरेका छन् ।
सो घट्नामा मारिएका दुई नाबालकसहित तीन जनाका आफन्तले विहिबार साढे १० बजेदेखि नेपालगञ्जको विपी चोकमा टायर बालेर नाराबाजी गर्दै चक्काजाम गरेका छन् ।
सुनसान सडकको छेउमा हिडिरहेकालाई पछाडीबाट कारले ठक्कर दिएर हत्या गरेको आरोप लगाउँदै कार चालकलाई कडा भन्दा कडा सजाय र क्षतिपुर्तिको माग गरेर विरोध प्रदर्शन गरिएको मृतकका आफन्त राजा ईद्रिसीले बताउनुभयो ।
उहाँले कार चालकलाई हदैसम्मको सजाय र क्षतिपुर्तिको ग्यारेन्टी नभएसम्म विरोध प्रदर्शन र चक्काजाम जारी रहने बताउनुभयो ।
गत आइतवार राती ११ः३८ बजे प्रदेश ३–०१–२३ च ८४८१ नम्बरको धम्बोझीतर्फबाट अत्याधिक तिव्र गतिमा आएको कारको ठक्करबाट सडकको छेउमा हिंडीरहेका वडा नम्बर ११ सुनारमण्डी निवासी ६५ वर्षीया समिमा इद्रिसी, ५ वर्षका कसिम इद्रिसी र ६ वर्षका अलि अन्सारीको मृत्यु भएको थियो ।
सो कार नेपालगञ्ज १० का रेष्टुरेन्ट व्यवसायी २८ वर्षिय इन्द्र बहादुर थापाले मदिरा सेवन गरेर चलाएका थिए ।
जिल्ला प्रहरी कार्यालय बाँकेका प्रवक्ता डीएसपी मधुसुदन न्यौपानेका अनुसार विपी चोक र धम्बोझीको विचमा पर्ने सडकको छेउमा हिडिरहेका ६ जना मध्ये तीनजनालाई थापाले मदिरा सेवन गरेर चलाएको कारले ठक्कर दिंदा मृत्यु भएको थियो ।
कार चालकलाई जोगाउने प्रयास भैरहेको जानकारी पाएर आफुहरु बाध्य भै आन्दोलनमा उत्रिनु परेको मृतक समिमा ईद्रिसीका भाई नईम ईद्रिसीले बताउनुभयो । उहाँले ती चालकलाई जोगाउने हो भने उनले फेरी पनि अरुलाई यसरी नै मदिरा सेवन गरेर गाडी चलाएर मार्ने बताउनुभयो । मृतकका आफन्त र स्थानीयले गरेको ओन्दोलनका कारण जमुनाहा कोहलपुर सडक खण्ड अवरुद्ध भएको छ । सो सडक खण्ड अवरुद्ध हुँदा उक्त सडकमा आवागमन गर्ने सवारी साधन ठप्प भएका छन् । आन्दोलनकारीले विभिन्न नारा लगाउँदै आन्दोलन गरिरहेका छन् । मृतकका आफन्तहरुले धर्ना समेत दिईरहेका छन् ।
यता मानव अधिकार संरक्षण तथा प्रवर्द्धन केन्द्रका अध्यक्ष आलम खानले सामाजिक संजाल मार्फत पिडितलाई न्यायको अनुभूति गराउन तर्फ भुमिका निर्वाह गर्न अपिल गर्नु भएको छ । उहाँले ट्राफिक प्रहरी कमाउने धन्धामा लागेको कारण नेपालगञ्जमा दुर्घटना बढ्दै गएकोले कमाइ धन्दा बन्द गरेर जनताको सुरक्षाका निम्ति खटन अपिल गर्नु भयो । खानले अन्दोलनमा बसेका व्यक्तिहरु ब्रत बसेकोले गृह प्रशासनलाई आन्दोलनकारीको मागलाई सम्बोधन गर्न प्रतिबद्धता व्यक्त गरी अन्दोलन फिर्ता लिन लगाउन भुमिका निर्वाह गर्न अपिल गर्नु भयो ।
