नेपालगञ्ज । पश्चिम नेपालको नेपालगञ्ज विमानस्थलमा अत्याधुनिक ‘टर्मिनल’ भवन निर्माण कार्य तोकिएको समयअघि नै सम्पन्न भएको छ । अब केही दिनमै उक्त भवन नेपालगञ्ज विमानस्थल टर्मिनल भवन आयोजनालाई औपचारिक रूपमा हस्तान्तरण गरिने भएको छ ।
नेपाल नागरिक उड्डयन प्राधिकरणका महानिर्देशक प्रदीप अधिकारीले आज सम्पन्न भवनको निरीक्षण गर्दै यसलाई चाँडै सञ्चालनमा ल्याउने तयारी भइरहेको जानकारी दिए । उनले पोखरा, भैरहवा र त्रिभुवन अन्तर्राष्ट्रिय विमानस्थलभन्दा पनि गुणस्तरीय ढङ्गले निर्माण भएको यो भवनले रोजगारी वृद्धिमा सहयोग पुर्याउने विश्वास व्यक्त गरे ।
काठमाडौँपछिको दोस्रो ठूलो विमानस्थलको रूपमा रहेका नेपालगञ्ज विमानस्थलबाट भारतका प्रमुख सहर दिल्ली र लखनउका लागि उडान सुरु गर्ने तयारी भइरहेको पनि उनले जानकारी दिए । “यो टर्मिनल भवन अन्तर्राष्ट्रिय उडानका लागि पनि उपयुक्त छ,” अधिकारीले भने, “नेपाल र भारतबीच यस सम्बन्धी छलफल जारी छ ।”
धनी मुलुकका पर्यटकले नेपालका विमानस्थल हेरेर ‘गरिब देशमा आएको’ अनुभूति गर्ने अवस्था अब समाप्त हुने उनले बताए । “अहिलेको टर्मिनल भवन अत्याधुनिक र अन्तर्राष्ट्रिय मापदण्डअनुसारको भएकाले नेपालको विमानन क्षेत्रको छवि सुधार हुनेछ,” उनले भने ।
नेपालगञ्ज विमानस्थल टर्मिनल भवन आयोजनाका प्रबन्धक नलविक्रम थापाका अनुसार करिब डेढ महिनाअघि निर्माण कम्पनीले काम पूरा गरेको हो । कुल लागत रु २ अर्ब ९८ करोड रहेको यस भवनको काम अत्यन्त सन्तोषजनक रूपमा सम्पन्न भएको उनले बताए ।
शर्मा एण्ड कम्पनीका अध्यक्ष तथा प्रबन्ध निर्देशक रमेश शर्माले निर्धारित म्यादभन्दा दुई महिना अघि निर्माण सम्पन्न भएको बताए । “नेपालमा समयमा काम सकिँदैन भन्ने भनाइलाई यस आयोजनाले गलत सावित गरेको छ,” उनले भने ।
भवनमा अत्याधुनिक प्रविधि र सुविधा समेटिएका छन् । ‘पिक आवर’मा प्रतिघण्टा एक हजार ६०० यात्रुलाई सेवा दिन सकिने गरी निर्माण गरिएको टर्मिनल भवन विसं २०७९ पुसदेखि निर्माण सुरु गरिएको थियो । सेमी बेसमेन्टसहित तीनतले यो भवन ५ हजार ७५ स्क्वायर मिटर क्षेत्रफलमा फैलिएको छ ।
भवनभित्र यात्रु चेकजाँच काउन्टर १४, भिआइपी कक्ष ३, बच्चाहरूका लागि खेल क्षेत्र, भन्सार तथा क्वारेन्टिन चेकजाँचका अलग कक्षहरू छन् । साथै परिसरमा बगैँचा, पाँचदेखि १४ मिटर फराकिलो बाटो, ढल र पानी निकासका लागि अत्याधुनिक नाला प्रणालीको व्यवस्था गरिएको छ ।
