बाँके । नेकपा एमाले बाँकेले आयोजना गरेको जनप्रदर्शन कार्यक्रमलाई सम्बोधन गर्दै एमालेका केन्द्रीय सदस्य मोहम्मद हारुन हल्वाइले जेनजीका नाममा सरकारी कार्यालयमा आगजनी र हतियार लुटपाटजस्ता घटनामा संलग्नहरुलाई छुट नदिने चेतावनी दिएका छन् । उनले लुटिएको हतियार फिर्ता नआए र दोषीमाथि कारबाही नगरी सरकार मौन बसिरहे आगामी निर्वाचन हुन नसक्ने स्पष्ट पारे ।
हल्वाइले नेकपा एमाले “देश जलाउने होइन, देश बनाउने पार्टी” भन्दै मुलुक विकास, सुशासन र स्थिरता एमालेको मूल एजेन्डा रहेको उल्लेख गरे। उनले निकट भविष्यमा हुने पार्टी महाधिवेशनबाट अध्यक्ष केपी शर्मा ओली नै पुनः निर्वाचित हुने दाबी गर्दै ओलीको नेतृत्व निरन्तरताकै कारण देश अघि बढ्ने विश्वास व्यक्त गरे ।
अध्यक्ष ओलीविरुद्ध निरन्तर गलत प्रचार र आधा–सत्य बोली राजनीति गरिरहेका केही समूहलाई उनले “सर्प” को संज्ञा दिंदै पार्टीभित्रका त्यस्ता विघटनकारी मानसिकता भएका व्यक्तिलाई महाधिवेशनबाट नै “सदाका लागि अन्त्य” गर्ने चेतावनी दिए ।
कार्यक्रममा सहभागी जनसमुदायले भने मुलुकमा बढ्दै गएको असुरक्षा, अराजकता र राजनीतिक अस्थिरताबारे चासो व्यक्त गर्दै एमाले नेतृत्वले उठाएको कडा सन्देशलाई समर्थन गरेका थिए ।
