बाँके । बाँके जिल्लामा सुशासन, शान्ति–सुरक्षा र कानुनी शासन स्थापना गर्न निडर र इमानदार नेतृत्व प्रदान गर्दै आएका प्रमुख जिल्ला अधिकारी धर्मराज जोशीको सरुवा गर्न स्वार्थप्रेरित समूहहरूले चलाएको अभियानको विरोधमा बाँकेबासी उत्रिएका छन्।
जेनजी बाँके, नागरिक समाजका प्रतिनिधि, बुद्धिजीवी, व्यापारी, युवा तथा ४ सयभन्दा बढी सचेत नागरिकहरूले हस्ताक्षर गरि जिल्ला प्रशासन कार्यालयमार्फत गृहमन्त्री ओम प्रकाश आर्याललाई ज्ञापनपत्र बुझाउँदै प्रमुख जिल्ला अधिकारी जोशीको सरुवा रोक्न माग गरेका हुन्।
ज्ञापनपत्रमा भनिएको छ, “प्रमुख जिल्ला अधिकारी धर्मराज जोशीले भ्रष्टाचार नियन्त्रण, लागुऔषध नियन्त्रण, यौन व्यवसाय नियन्त्रण, जुवा नियन्त्रण र धार्मिक सद्भाव कायम गर्न उल्लेखनीय काम गर्नुभएको छ। यस्तो जनमुखी, इमानदार र निर्भीक प्रशासकको सरुवाको माग स्वार्थप्रेरित तत्वहरूको षड्यन्त्र हो।”
ज्ञापनपत्र बुझाउनेहरूले चेतावनी दिएका छन् कि “केही अमुक व्यक्तिको व्यक्तिगत स्वार्थका आधारमा यदि जोशीज्यूको सरुवा गरियो भने, बाँकेबासी सडकमा उत्रन बाध्य हुनेछन्।”
स्थानीयहरूका अनुसार, प्रमुख जिल्ला अधिकारी जोशीको आगमनपछि बाँकेमा प्रशासनिक सुधार, जनगुनासो समाधान, सीमाक्षेत्रमा बढ्दो तस्करी नियन्त्रण, र गैरकानुनी धन्दा विरुद्धका अभियानले तीव्रता पाएको छ।
जेनजी बाँकेका प्रतिनिधिहरूले भने, “जोशीज्यूले जनताको पक्षमा निर्भीक निर्णय लिनु भएको छ। उहाँजस्ता निडर र इमानदार अधिकारी नै सुशासनको मेरुदण्ड हुन्। यस्तो नेतृत्वलाई संरक्षण गर्नु सरकारको दायित्व हो।”
बाँकेका नागरिक समाजका अगुवाहरूले पनि गृहमन्त्री आर्याललाई आग्रह गर्दै भनेका छन् — “राजनीतिक दबाबमा होइन, जनताको विश्वासका आधारमा निर्णय गर्नुस्। बाँकेमा स्थायित्व, शान्ति र सुशासनका लागि धर्मराज जोशीको निरन्तरता अपरिहार्य छ।”
बाँकेमा जोशीको सरुवाको कुरा सार्वजनिक भएपछि सामाजिक सञ्जालदेखि नागरिक मञ्चसम्म एक स्वरमा उनको समर्थनमा आवाज उठ्न थालेको छ। नागरिकहरू भन्छन् — “जोशीज्यू जस्ता इमानदार प्रशासकको सरुवा होइन, सम्मान हुनुपर्छ।”
