बाँके । कमल थापाको नेतृत्वमा राप्रपा नेपाल पुनर्जागृत भएको केहि महिनामै यस पार्टीमा युवाहरुको आकर्षण बढ्दै गएको छ ।
केन्द्रीय कार्य समिति निर्माण, जिल्ला कार्य समितिहरुको विस्तार गर्दै संगठन गर्न थालेको राप्रपा नेपालमा राप्रपा परित्याग प्रवेश गर्नेहरुको लर्को लागेको छ ।
राप्रपा नेपालका केन्द्रीय सदस्य एक्बाल इराकी, श्रीधर सुवेदी र बाँके अध्यक्ष दिपेन्द्र सिंहको सहजिकरणमा शनिबार दर्जनौ युवाहरु राप्रपा परित्याग गर्दै राप्रपा नेपालमा प्रवेश गरेका हुन ।
नवप्रवेशीहरुले बाँकेलाई राप्रपा नेपालमय बनाउने महान उद्देश्य लिएर उर्जाका साथ राप्रपा नेपालमा प्रवेश गरेको राप्रपाबाट निर्वाचित जनप्रतिनिधि आशा बिष्टले बताउनुभयो। उहाँले आउने निर्वाचनमा बाँकेबाट राप्रपा नेपालले स्थानीय तहहरुमा नेतृत्व गर्ने बताउदै आवश्यकता अनुसार गठबन्धन निर्माण गरेर निर्वाचनमा होमिने बताउनु भएको थियो ।
उहाँले राप्रपामा बसेर युवा र महिलाहरुको भबिष्य नदेखे पछि कमल थापा कै नेतृत्वमा आफुहरुको भविष्य रहेकोले राप्रपा परित्याग गरि राप्रपा नेपालमा प्रवेश गरेको जिकिर गर्नु भएको थियो ।
राप्रपा नेपालका केन्द्रीय सदस्य इराकी र सुबेदीको बिशेष उपस्थितीमा भएको पार्टी प्रवेश कार्यक्रम नेपालगञ्ज उपमहानगरपालिका वडा नं २ को निर्वाचित वडा सदस्य आशा बिष्टको नेतृत्वमा तिन दर्जन भन्दा बढीले राप्रपा नेपाल प्रवेश गरेको बाँके अध्यक्ष दिपेन्द्र सिंहले युथ टुडे न्युजलाई जानकारी दिनु भयो । अध्यक्ष सिंहले नवप्रवेशीहरुलाई स्वागत गर्दै राप्रपाको नाम मेटाएर राप्रपा नेपाललाई बाँकेमा स्थापित गर्ने अभियानमा रहेको बताउँदै अबको आउने निर्वाचनमा राप्रपाबाट उम्मेदवारी दिनेहरुको धरौटी समेत जफत हुने ठोकुवा गर्दै राप्रपा नेपालले स्थानीय निर्वाचनको नेतृत्व गर्ने दाबी गर्नु भएको थियो ।
