काठमाडौँ । नेपाल मुस्लिम इत्तेहात सङ्गठनका केन्द्रीय अध्यक्ष माेहम्मद हारुन हलवाईले पार्टी अध्यक्षमा केपी शर्मा ओली नेतृत्वको टिम विजयी भए मात्र नेकपा (एमाले) को सिद्धान्त, नीति, कार्यक्रम र आन्दोलन सही दिशामा अघि बढ्ने स्पष्ट गरेका छन् ।
आसन्न पार्टी महाधिवेशनका सन्दर्भमा प्रतिक्रिया दिँदै अध्यक्ष हारुनले केपी शर्मा ओली नेतृत्वको टिममा देखिएको एकता, सहकार्य र विजयउन्मुख वातावरणबाट आत्तिएर विभिन्न खालका अपवाह फैलाइँदै आएको बताए ।
उनले प्रतिनिधिहरूलाई भ्रमित पार्ने उद्देश्यले केही सञ्चारमाध्यम र व्यक्तिहरुमार्फत् ओली नेतृत्वको टिमविरुद्ध आएका समाचारमा कुनै पनि सत्यता नरहेको दाबी गरे ।
“अहिले केपी शर्मा ओली नेतृत्वको टिममा अभूतपूर्व एकता र उत्साह देखिन्छ । यही कारण अनावश्यक हल्ला र अपवाह फैलाउने प्रयास भइरहेको छ,” अध्यक्ष हारुनले भने, “यस्ता भ्रमपूर्ण सूचनाको पछि नलाग्न म सबै प्रतिनिधिहरूलाई आग्रह गर्दछु ।”
अध्यक्ष हारुनले मुस्लिम समुदायबाट प्रतिनिधित्व गर्ने प्रतिनिधिसहित सम्पूर्ण प्रतिनिधिहरूलाई एकताबद्ध भएर अध्यक्षमा केपी शर्मा ओली, उपाध्यक्षहरू, महासचिव शंकर पोखरेललगायत पदाधिकारी तथा केन्द्रीय सदस्य पदका उम्मेदवारहरूलाई विजयी बनाउन आह्वान गरे ।
बलियो नेतृत्व र स्पष्ट वैचारिक दिशाबिना पार्टी सशक्त बन्न नसक्ने उल्लेख गर्दै केन्द्रीय सदस्य (मुस्लिम काेटा) का उम्मेदवार रहेका हलवाईले ओली नेतृत्वको टिमलाई जिताउन सबैलाई आग्रह गरे ।
