बाँके । नेपालगन्ज औद्योगिक क्षेत्र उद्योग विकास संघको अध्यक्षमा अब्दुल वाहिद अन्सारी निर्वाचित भएका छन् । शनिवार नेपालगन्जमा भएको दोस्रो वार्षिक साधारण सभा तथा दोस्रो अधिवेशनले अन्सारीलाई अध्यक्षमा निर्वाचित गरेको हो ।
अधिवेशनले उपाध्यक्षमा विवेक थापा, सचिवमा शरदप्रसाद रिजाल, सह–सचिवमा छायाँचन्द्र वाग्ले र कोषाध्यक्षमा गौरव डागालाई चयन गरेको नव निर्वाचित अध्यक्ष अन्सारीले जानकारी दिए । उनका अनुसार सदस्यमा ऋदिकरण जैन, चम्पालाल बोथरा, होमनाथ ज्ञावाली, मिनेस मास्के, सुल्तान सलाहुदिन र सिवा सुमन सोनी चयन भएका छन् । अधिवेशनबाट संघको नयाँ नेतृत्व चयन भएको छ, जसअनुसार अध्यक्ष पदमा अब्दुल वाहिद अन्सारी निर्वाचित भएका छन्।
नेपालगन्ज उद्योग बाणिज्य संघको पूर्व सदस्य समेत भइसकेका अध्यक्षमा निर्वाचित अन्सारीले नेपालगन्ज औद्योगिक क्षेत्रको विकासका लागि संघले सहयोगी भूमिका खेल्ने प्रतिवद्धता जनाएका छन् । उनले नेपालगन्ज औद्योगिक क्षेत्रको विकासका लागि संघ गठन भएको बताउँदै औद्योगिक क्षेत्र ब्यवस्थापन समितिसँग मिलेर काम गर्ने बताए । ‘नेपालगन्ज औद्योगिक क्षेत्रमा रहेका कलकारखाना र उद्योग, उद्योगमा कार्यरत कर्मचारी र सिंगो औद्योगिक क्षेत्रको विकासमा संघ सदैव सहयोग गर्न तयार छ,’ उनले भने ।
उनले कोरोनाका कारण समस्यामा परेका उद्योगले अझैँ लय समात्न नसकेको बताउँदै विद्युत अनियमित हुँदा झनै समस्या पारेको बताए । ‘नेपालगन्ज औद्योगिक क्षेत्रभित्र रहेका सम्पूर्ण उद्योग र त्यसमा कार्यरत कर्मचारी तथा उद्योगीको हितमा काम गर्न संघ गठन भएको हो । नव निर्वाचित समिति सिंगो औद्योििगक क्षेत्रको विकासमा औद्योगिक क्षेत्र ब्यवस्थापन समितिलाई सहयोग गर्ने प्रतिवद्धता जाहेर गर्दछ,’ उनले भने ।
‘काम गरौं, अगाडि बढौं’ भन्ने भावना बोकेर अघि बढ्ने बताउँदै उनले मिहिनेत गरेमात्र प्रगति सम्भव हुने बताए । काम गरेमात्र अगाडी बढ्न सकिन्छ भन्ने संघको मान्यता छ,’ उनले भने, ‘संघको नीति र उद्देश्य अनुरुप नयाँ कार्यसमिति अगाडी बढ्ने म स्पष्ट पार्न चाहन्छु ।’
उनले नेपालगन्ज उद्योग बाणिज्य संघको कार्यसमिति सदस्य भएका बेला बटुलेको अनुभवलाई संघमा प्रयोग गर्ने स्पष्ट पारे । ‘संघका साधारण सदस्यले दिएको जिम्मेवारीलाई कुशलतापूर्वक बहन गर्ने र आउने समस्या तथा चुनौतिको सामना गरि अगाडी बढ्ने म स्पष्ट पार्न चाहन्छु,’ अन्सारीले भने ।
नयाँ नेतृत्वले नेपालगन्ज औद्योगिक क्षेत्रको समग्र विकास, लगानी प्रवर्धन तथा उद्योगी–व्यवसायीको हितका लागि प्रभावकारी कदम चाल्ने धारणा राखेका छन् । संघले औद्योगिक क्षेत्रभित्रको पूर्वाधार, नीतिगत सुधार र सहकार्यमा आधारित वातावरण निर्माणलाई प्राथमिकता दिने प्रतिबद्धता नव निर्वाचित अध्यक्ष अन्सारीले जनाएका छन् ।
