बाँके । बाँकेको सबै भन्दा विकट मानिएको नरैनापुर ५ वर्षमा सुगम बनेको छ । नरैनापुर गाउँपालिकाको जयरामपुर्वामा १५ शैयाको अस्पतालको आज जिल्ला समन्वय समिति बाँकेका प्रमुख अजय कुमार श्रीवास्तब र गाउँपालिकाका अध्यक्ष इस्तियाक अहमद शाहले शिलान्यास गर्नु भएको छ ।
वडा नम्बर ४ जयरामपुर्वामा बन्ने अस्पताल निर्माणको जिम्मा हनुमान कन्स्ट्रक्सन ललितपुरले पाएको छ ।
यस अस्पतालको २०८० साल असोज १० गते निर्माण सम्पन्न हुने लेखापाल प्रकाश अधिकारीले बताउनु भयो। अस्पताल निर्माणका लागि १६ करोड ९७ लाख ५१ हजार ३ सय ५४ रुपैयाँ ५० पैसामा सम्झौता भएको अधिकारीले जानकारीले युथ टुडेलाई जानकरी दिनु भयो ।
१५ शय्याको अस्पताल भवनसहित चिकित्सक, नर्सिङ आवास, चमेनागृह (क्यान्टिन), शवगृह, पार्किङलगायतका संरचना निर्माण हुने गाउँपालिकाले जनाएको छ । स्वास्थ्य सेवाको पहुँचभन्दा टाढा रहेको ग्रामीण क्षेत्रका नागरिकलाई सहज सेवा पुर्याउने उद्देश्यले आधारभूत अस्पताल निर्माणलाई प्राथमिकता दिएर जुटेको गाउँपालिकाका अध्यक्ष शाहले बताउनु भयो । अस्पतालले सदरमुकामबाट टाढा रहेका नरैनापुर क्षेत्रका बासिन्दालाई सुविधा पुग्ने अध्यक्ष शाहको भनाइ थियो ।
