बाँके । जिल्ला प्रहरी कार्यालय बाँकेले अपराध नियन्त्रणमा गत माघ महिनामा उल्लेख्य काम गरेको जनाएको छ ।
जिल्ला प्रहरी कार्यालय बाँकेद्वारा आज बिहीबार आयोजित पत्रकार सम्मेलनमा प्रहरी उपरीक्षक तुल बहादुर कार्कीले जिल्लामा शान्ति सुरक्षालाई चुस्त, दुरुस्त बनाउन अपराध नियन्त्रणका लागि प्रहरीले पूर्ण रुपमा व्यावसायिक तथा पारदर्शी ढङ्गले काम गरिरहेको बताउनुभयो ।
उहाँले भन्नुभयो,”बाँकेमा हुने अपराध नियन्त्रणका लागि नेपाल प्रहरी लागिरहेको छ, कानून विपरीत काम गर्ने जो कोहीलाई कारबाही गर्छौँ ।”
प्रहरी उपरीक्षक कार्कीले राष्ट्र निर्माणको दायित्व सबैको उत्तिकै भएको बताउँदै यसलाई साथ दिन सञ्चारकर्मीलाई आग्रह समेत गर्नुभयो ।
पत्रकार सम्मेलनमा प्रहरी उपरीक्षक कार्कीले समाजमा हुने अपराध नियन्त्रणका लागि प्रहरीले अगाडि सारेको समुदाय–प्रहरी साझेदारी कार्यक्रमअन्तर्गत ८ वटै स्थानीय तहमा काम गरी रहेको बताउनुभयो ।
उपरीक्षक कार्कीले भन्नुभयो “माघ महिनामा ‘प्रहरीले १४ लाख ४३ हजार १ सय ९६ बराबरको अवैध भन्सार छलिको समान पक्राउ गरी सम्बन्धि निकायलाई बुझाएको छ भने ३२ सय ९७ वटा सवारीसाधनलाई कारबाही गरी २५ लाख ४५ हजार राजश्व सङ्कलन गरेको छ ।” उहाँले भन्नुभयो १४६ वटा मुद्दा दर्ता भएको मा १३५ जना व्यक्तिलाई पक्राउ गरी कानुनी दायरामा ल्याइएको बताउनुभयो ।
प्रहरी निरीक्षक शिवा थापाले घरेलु हिंसा सम्बन्धि ४० वटा उजुरी परेकोमा ३३ वटा फर्छ्योट गरेको बताउँदै भन्नुभयो बाँकी ७ वटा अनुसन्धानमा रहेको जानकारी दिनुभयो ।
लागूऔषधविरुद्धको कारबाहीमा जिल्ला प्रहरी कार्यालय बाँकेले ५४ ग्राम ३३० मिलिग्राम ब्राउन सुगर, १९० ट्याब्लेट नाइट्राजेपामसहित ३४ जना ओसारपसार कर्ताहरुहरुलाई पक्राउ गरी कानूनी दायरामा ल्याइएको छ ।
त्यस्तै आन्तरिक सुदृढीकरण प्रयासतर्फ उत्कृष्ट कार्य गर्ने ४ जना प्रहरी कर्मचारीहरुलाई पुरस्कृत र आचरण बिपरीत कार्य गर्ने १ जना प्रहरी कर्मचारीलाई कारवाही गरिएको छ भने खजुरामा आयोजित फुटबल प्रतियोगितामा जिल्ला प्रहरी कार्यालयको फुटबल टिमले प्रथम स्थान हासिल गरेको पनि बाँके प्रहरीले जानकारी दिएको छ ।
प्रहरी निरीक्षक हिमराज विकले कार्य प्रगति विवरण प्रस्तुत गरेका थिए । बाँके प्रहरी प्रमुख प्रहरी उपरीक्षक तुल बहादुर कार्कीले ट्राफिक व्यवस्थापन र फूटपाथ खाली गराउन प्रयासरत रहेको बताए । कार्कीले लागूऔषध नियन्त्रण र सडक दुर्घटना न्यूनीकरण चुनौतीको रुपमा देखिएको बताउनुभयो ।
