काठमाडौं । लामो समय राजसंस्थाको एजेण्डा बोकेर राजनीति गर्दै आएका कमल थापा अहिले राजाकै आलोचना गर्नमा खर्चिरहेका छन् । राष्ट्रिय प्रजातन्त्र पार्टी (राप्रपा)को महाधिवेशनमा राजेन्द्र लिङ्देनसँग पराजित भएसँगै थापाले राजसंस्थाको आलोचनामा खर्चिन थालेका हुन् ।
पछिल्लो समय राप्रपा नेपाल व्यूँताएर पुनः अध्यक्ष बनेका थापाले अब राजा फर्कने सम्भावना सकिएको बताउन थालेका छन् । शनिबार सामाजिक सञ्जाल फेसबुकमा स्ट्याटस लेख्दै उनले पुराना नेतालाई धैर्यता रहुञ्जेल राजा बोक्नसमेत सुझाए ।
पुरानो पार्टीका नेताहरूसँग कुनै गुनासो नभएको उनको भनाइ छ । नयाँ वर्षको अवसरमा शुभकामना दिँदै थापाले सामाजिक सञ्जालमा लेखेका छन्, ‘राष्ट्रिय प्रजातन्त्र पार्टी र सो पार्टीका नेताहरूसँग मेरो गुनासो, वैमनस्यता छैन। तपाईंहरूको धैर्यता रहुञ्जेल राजा बोक्नोस्, मेरो शुभकामना छ। विभिन्न कारणवश मैले राजाको एजेण्डा छोडेँ । तितो लाग्ला, अब राजा फर्कने सम्भावना सकियो ।’
उनले पार्टीहरू असफल भएर राजा आउने नआउने भन्दै एउटा पार्टी असफल भए अर्को आउनेसमेत बताएका छन् । ‘राजा फर्कने अरू नै कारण थिए । राजाले नै त्यो बाटो बन्द गरिदिए । अब असम्भव एजेण्डा बोकेर नयाँ पिँढीलाई भ्रममा पार्नु हुँदैन । असम्भव एजेण्डा बोकेर हिन्दुराष्ट्रलाई बन्धक बनाउन हुँदैन । २÷३ प्रतिशत भोटको जगमा राप्रपा ठूलो हुँदैन’ उनको भनाइ छ ।
उनले अगाडि भनेका छन्, ‘मलाई थाहा छ, अन्ततः तपाईंहरू मेरै बाटोमा आउनुपर्छ। अहिले गालीगलौज र आरोपहरू खेपेर भए पनि तपाईंहरूको लागि म बलियो घर बनाएर राखिदिनेछु । पहिले पनि मैले बनाएकै घरमा तपाईंहरू आएको हो। त्यहाँ अझै केही समय रमाई राख्नोस् ।’ राजाको माया त लाग्छ, त्यसैले राजसंस्थाप्रति मेरो सम्मान सदैव रहिरहने छ ।’
