बाँके । छैठौं राष्ट्रिय महिला अधिकार दिवसको अवसरमा बाँकेको राप्ती सोनारीमा २० जना महिलाहरुलाई खाद्यान्न उपलब्ध गराईएको छ ।
‘हाम्रो अभियान ‘ आत्मनिर्भर छोरीको सम्मान’ भन्ने नाराका साथ विभिन्न कार्यक्रम गरी दिवस मनाइँदैछ । गाउँपालिकाले ९ वटा वडाहरु मध्ये वडा न . ७ को २० जना विपन्न महिलाहरूलाई चामल दाल, नुन तेल र झुल वितरण गरिएको हो ।
राप्ती सोनारी गाउँ पालिका उपाध्यक्ष मनिषा सिंह थारुले नारामा मात्रै सिमित हुनुभन्दा केही भए पनि जीवन यापनमा सहज होस भनेर प्रती महिलालाई २ बोरा चामल, ५ किलो दाल, १ लिटर खाने तेल, १ किलो नुन र झुल वितरण गरिएको बताउनु भयो ।
उपाध्यक्ष थारुले १ लाख मुल्य बराबरको खाद्यान्न र झुल वितरण गरिएकोमा बिपन्न महिलाहरुलाई केही भए पनि राहत मिल्ने जिकिर गर्नु भयो । 
कार्यक्रममा वडा न . ७ का वडा अध्यक्ष रामलखन थारुले स्थानीय सरकारको उपस्थिति महसुस हुने कार्यक्रम अन्तर्गत उक्त खाद्यान्न वितरण गरिएको उल्लेख गर्नु भयो । साथै उक्त वडाको ७ जना आगलागी पीडितलाई समेत राहत वितरण गरिएको थियो ।
नेपाल पत्रकार महासंघ बाँकेका सहसचिव हेमन्त चौधरीले विभिन्न नीतिगत र कार्यगत प्रयासहरू हुँदाहुँदै पनि महिलाहरू सामाजिक‚ सांस्कृतिक‚ शैक्षिक‚ राजनीतिक एवं आर्थिक रूपमा पछाडि परिरहेका बताउनु भयो । उहाँले ‘कार्यस्थल, शैक्षिक संस्थान, सार्वजनिक स्थान तथा घर समाजमा नै महिलाहरू पूर्ण रूपमा सुरक्षित नभई महिला तथा बालबालिकामाथि हुने हिंसाजन्य घटनाहरू हुनु आफैमा अत्यन्त दुखद् कुरा भएको उल्लेख गर्नु भयो । यस्ता क्रियाकलापहरूको निराकरणको निम्ति राज्यका सम्पूर्ण संयन्त्रहरूले यस विषयलाई मुख्य प्राथमिकताका साथ लिनु पर्ने धारणा राख्नु भएको थियो ।
