बाँके २४ जेष्ठ । इस्लाम धर्मावलम्बीहरुको दोस्रो ठूलो पर्व इद-उल-अजहा (बकर इद) सामुहिक नमाज पढेर एक आपसमा शुभकामना साटासाट गर्दै मनाइएको छ ।
बकर इदको रौनकले नेपालगन्ज, बेतहनी र नरैनापुरमा चहलपहल बढाएको छ ।
तिर्थाटन र बलिदानको पर्वको रुपमा मनाइने यो पर्व मुस्लिम समुदायका व्यक्तिहरु विहान इदगाहमा सामूहिक नमाज पढेर आफ्नो पर्व मनाउन तल्लिन छन् ।
नेपालगन्जको विपिचोक र बेतहनीको जाफरपुर्वामा रहेको इदगाहमा इस्लाम धर्मावलम्बीहरुले मुलुकमा शान्ति अमनचैन माग गर्दै सामुहिक नामज पढेर एक अर्कासित अंगालो मार्दै मनाउन शुरु गरेका छन् । आज शनिबार विहान ७ बजे उनीहरुले इदगाह मस्जिदमा जम्मा भएर समुहिक नमाज पढेका थिए ।
यो पर्व तीन दिनसम्म शनिबारदेखि सोमबारसम्म मनाईने यो पर्व हज र कुर्वानी (वलि) गर्नुपर्ने प्रमुख विषेशता रहेको बकरईदमा ईस्लाम धर्मावलम्बीहरुका लागि हज र कुर्वानी अनिबार्य भएकोले मुस्लिम समुदायले ईगदाहमा नमाज पढेपछि दक्ष अनुसारको पशु वलि कुर्वानी दिने प्रचलन रहेको मुस्लिम धर्मगुरु जाफर रजाले बताउनु भयो ।
बाँकेमा बकरईदको लागि कुर्वानी (वली) दिन हजारबढी पशुहरु ल्याईएको छ । मुस्लिम समुदायले यो पर्वमा राँगा, खसी बाख्रा, भेडा, उटको कुर्वानी दिने चलन छ । कुर्वानी दिएको जनावरको मासु तीन भागमा बाँडेर एक भाग आफ्नो परिवारमा, एक भाग आफन्त तथा छरछिमेकमा र एक भाग विपन्न तथा गरिवलाई बाँड्नै पर्ने चलन रहेको धर्म गुरु मिस्बाहिले जानकारी दिनु भयो ।
ईस्लामिक तारिक हिजरी संवत १४३५ जिलहिज्जा (महिना)को १० तारिकबाट शुरु हुने सो पर्व मनाउनको लागि शनिबार विहानैदेखि नेपालगन्जको वीपी चौकस्थित रहेको इदगाह र बेतहनीको जाफरपुर्वामा रहेको इदगाहमा आसपासका ग्रामीण क्षेत्रबाट आएका मुश्लिम धर्माबलम्बीहरुको घुइँचो लागेको थियो ।
यसैगरि नरैनापुर गाउँपालिकाका अध्यक्ष शैयद इस्तियाक अहमद शाहले बक्रा ईद पर्वको शुभकामना दिदैं भन्नुभयो, सामूहिकरूपमा नमाज पढ्दै एक आपसमा शुभकामना साटासाट गर्ने हुँदा यस परम्पराले आपसी सद्भाव, सहिष्णुता, मेलमिलाप र भाइचारा अभिवृद्धि गर्न मद्दत पुग्ने विश्वास व्यक्त गर्नु भयो ।
