एजेन्सी । साउदी अरबले शनिबार ८१ जनालाई मृत्युदण्डको सजाय दिएको छ ।
साउदी सरकारले आतंकवादसँग सम्बन्धित विभिन्न अपराधमा एकै दिन ८१ जनालाई मृत्युदण्ड दिएको हो । उक्त राज्यले गत वर्ष दिएको मृत्युदण्डको कूल संख्याभन्दा बढी एकै दिन ठूलो संख्यामा यस्तो सजाय दिएको छ । उनीहरूलाई घोर अपराधको दोषि ठहर गर्दै मृत्युदण्ड दिइएको साउदी अरबको राज्य सञ्चालित समाचार संस्था साउदी प्रेस एजेन्सी (एसपीए) ले जनाएको छ ।
एसपीएका अनुसार उनीहरू इस्लामिक स्टेट समूह, यमनको हुथी विद्रोही सेना र अल–कायदासँग सम्बद्ध रहेको मानिएका कैदीहरूसहित ‘आतंकवादी संगठनहरू’ मा आबद्ध हुन् । उनीहरूले महत्वपूर्ण आर्थिक स्थलहरूमा आक्रमण गर्ने योजना बनाएका, सुरक्षा बलका सदस्यहरूलाई निशाना बनाएका वा हत्या गरेका र देशभित्र हतियार लुकाएका अदालतको फैसलामा उल्लेख गरिएको जनाइएको छ ।
८१ जनामध्ये ७३ साउदी नागरिक, सात यमनी र एक सिरियाली नागरिक छन् । मृत्युदण्ड पाएका सबैलाई साउदी अदालतमा मुद्दा चलाइएकोे र प्रत्येक व्यक्तिका लागि तीन अलग–अलग चरणमा १३ जना न्यायाधीशले मुद्दामाथि सुनुवाई गरेका एसपीएको समाचारमा उल्लेख छ ।
तेलका लागि विश्वकै धनी खाडी मुलुकमा मृत्युदण्डको दर विश्वकै सबैभन्दा धेरै छ । शनिबारको फैसलाले एक दिनमा राज्यमा यस पहिले उच्च रेकर्ड गरिएको सबैभन्दा धेरै मृत्युदण्ड र सन् २०२१ को कूल ६९ मृत्युदण्डलाई पनि पछि पारेको छ ।
