बाँके। बाँकेको जानकी गाउँपालिकाले चाडपर्वको समयमा हुनसक्ने मूल्यवृद्धि तथा कालोबजारीलाई मध्यनजर गरी बजार अनुगमन गरेको छ । 
बिहीवार गाउँपालिकाको वडा नं। ६ स्थित पिप्रहवा बजारमा अनुगमन गरिएको गाउँपालिकाका प्रमुख प्रशासकिय अधिकृत बस बहादुर रानाले जानकारी दिनुभयो । अनुगमनका क्रममा म्याद नाघेका उपभोग्यवस्तु, अखाद्य तेल, दर्ता नगरेरै मदिरा तथा सुर्तीजन्य वस्तुको बिक्री वितरण गरेको पाईएको युथ टुडेलाई बताउनु भयो ।
पिप्रहवास्थित खुदरा किराना एण्ड खाद्य स्टोर, प्रमोद गुप्ता स्टोर एण्ड सप्लायर्स, सुवोध स्टोर र रौनक जनरल स्टोरमा अनुगमन गर्दा १४ हजार २ सय ११ बराबरको म्याद गुज्रेको खाद्य पदार्थ र अनुमति नलिई बिक्री वितरणको लागि राखिएको ४ हजार बराबरको मदिरा र सुर्तीजन्य पदार्थ जफत गरेर नष्ट गरिएको गाउँपालिकाका प्रमुख प्रशासकीय अधिकृत रानाले बताउनु भयो । 
जिल्ला प्रशासन कार्यालय बाँकेका महेश्वर पौडेल, जानकी गाँउपालिकाका गोपी चौलागाइ, खाद्य प्रविधि गुण नियन्त्रण कार्यालयका विवेक सुवेदी, इलाका प्रहरी कार्यालय खजुराखुद्र्धका इन्चार्ज प्रहरी नायव निरीक्षक रुद्रबहादुर रावल सहितको टोलीले बजार अनुगमन गरेको जानकी गाउँपालिका बजार अनुगमन समितिका संयोजक जितबहादुर श्रेष्ठले युथ टुडेलाई जानकारी दिनुभयो ।
उहाँका अनुसार, बिहीवार पिप्रहवा बजारका किराना पसल सँगै अन्नपूर्ण भोजनालय, पाल ट्रेडर्स, मेडिकल लगायत १० वटा पसलको अनुगमन गरिएको जसका धेरै पसल र व्यवसायीलाई सचेत गराईएको जिकिर गर्नु भयो ।
चाडपर्वको बेला उपभोक्ता ठगिन नदिनको लागि गाउँपालिकाले नियमित रुपमा अनुगमन कार्यलाई निरन्तरता दिने प्रमुख प्रशासकीय अधिकृत रानाको प्रतिबद्धता थियो ।
