काठमाडौं । इरानले अमेरिकासँग भएको युद्धविराम सम्झौताका तीन सर्त उल्लंघन गरिएको आरोप लगाएको छ । इरानको संसद्का सभामुख मोहम्मद बागेर गालिबाफले विज्ञप्ति जारी गरी दशबुँदे प्रस्तावका तीन सर्त उल्लंघन गरिएको बताएका हुन् ।
यसमा लेबननमा इजरायलले जारी राखेको आक्रमण पनि उल्लेख गरेको छ ।
विज्ञप्तिमा भनिएको छ, ‘हामीले अमेरिकालाई विश्वास नगर्नुको कारण भनेको आफ्नो वाचा बारम्बार तोड्ने उसको लामो समयदेखिको बानी हो । यो दुर्भाग्यपूर्ण छ– उसले फेरि आफ्नो उही प्रवृत्ति दोहो¥याएको छ ।’
इरानी सभामुखले विज्ञप्तिमा अगाडि भनेका छन्, ‘अमेरिकी राष्ट्रपतिले स्पष्ट रूपमा भनेका थिए– इरानको दशबुँदे प्रस्ताव वार्ताको ’आधार’ हो । तर अहिलेसम्म यस प्रस्तावका तीन हिस्सा उल्लंघन गरिएको छ ।’
इरानका अनुसार ‘लेबननमा पनि युद्धविराम गरिने सर्त पालना गरिएन । जबकि मध्यस्थकर्ता मुलुक पाकिस्तानका प्रधानमन्त्री सहबाज सरिफले पनि स्पष्ट रूपमा भनेका थिए, युद्धविराम तुरुन्तै लागु गरिनुपर्छ लेबनन र अन्य क्षेत्रमा पनि ।’
इरानी सभामुख गालिबाफले थप भनेका छन्, ‘जुन प्रस्तावमा वार्ता गरिनुपर्ने थियो, त्यो छलफल सुरु हुनुभन्दा अगाडि नै तोडिएको छ । यस्तो अवस्थामा दुईतर्फी युद्धविराम वा वार्ता कुनै अर्थ छैन ।’
