बाँके । नेपालगन्ज मेडिकल कलेज शिक्षण अस्पतालका कर्मचारीले निर्णायक आन्दोलनको तयारी गरेका छन् । तलव, भत्ता लगायत सेवा सुविधा सम्बन्धी माग राख्दै कर्मचारीले यसअघि पटक पटक आन्दोलन गरेका थिए । अस्पताल ब्यवस्थापन पक्षले उनीहरुको मागलाई पूर्ण रुपले सम्बोधन गर्न सकेको थिएन ।
अहिले पुनः विभिन्न ७ बुँदे माग राख्दै तीन वटै कर्मचारी संगठनले संयुक्त रुपमा आन्दोलन घोषणा गरेका हुन् । सोमबार पत्रकार सम्मेलन गरी नेपालगन्ज मेडिकल कलेज कर्मचारी संघ, कर्मचारी संगठन र नेपाल स्वास्थ्यकर्मी तथा कर्मचारी यूनियनले संयुक्त रुपमा आन्दोलन घोषणा गरे । उनीहरुले यसपटकको आन्दोलन निर्णायक हुने र ब्यवस्थापन पक्ष माग पुरा गर्न बाध्य हुने पनि बताए । आन्दोलन अन्तर्गत सोमबार पत्रकार सम्मेलनसहित हातमा कालोपट्टी बाँधेर काम गरेका छन् ।
पत्रकार सम्मेलनमा आन्दोलन परिचालन समितिका संयोजक यमबहादुर खड्काले आन्दोलन कार्यक्रम अन्तर्गत मंगलबार मेडिकल कलेजको प्रशासनिक कार्यालयमा तालाबन्दी गरिने बताए । उनका अनुसार बुधबार शिक्षण अस्पताल नेपालगन्ज र कोहलपुरका आपतकालिन बाहेकका अन्य सेवा बन्द गरिनेछ । आन्दोलनबाट हुने क्षतिको जिम्मेवारी स्वयं कलेज ब्यवस्थापनले लिनुपर्ने कर्मचारीको चेतावनी छ ।
आन्दोलन परिचालन समितिका सह(संयोजक कुश्माखर बस्यालले यस पटक कडा र निर्णायक आन्दोलन हुने बताए । अर्का सह(संयोजक मुनिर खाँले अस्पतालबाट हुने आम्दानी अनुसार खर्च कर्मचारीको तलब, भत्ता बृद्धि नभएको बताए । मेडिकल कलेजले गर्ने खर्चभन्दा तेब्बर बढी आम्दानी भइरहेको सुनाए ।
मेडिकल कलेज ब्यवस्थापन र कर्मचारीबीचको विवाद श्रम कार्यालय हुदै विभाग र मन्त्रालयसम्म पुगेपनि समाधान हुन सकेको छैन । अस्पताल ब्यवस्थापन पक्षले भने कर्मचारीले कामभन्दा बढी अनावश्यक रुपमा राजनीति गरिरहेको आरोप लगाउँदै आएको छ ।
