बाँके । नेपाली कम्युनिष्ट पार्टीका तर्फबाट बाँके क्षेत्र नम्बर २ का प्रतिनिधिसभा उम्मेदवार दिपेन्द्र विष्टले शहीद आयुष थापाको बलिदान र भावनालाई आत्मसात गर्दै आफ्नो चुनावी अभियानलाई नयाँ उचाइमा पुर्याउनुभएको छ। सम्पर्क कार्यालय उद्घाटनदेखि घरदैलो अभियानसम्म विष्टले शहीदको सपना—भ्रष्टाचारमुक्त, समतामूलक र न्यायपूर्ण समाज—पूरा गर्नु नै आफ्नो राजनीतिक यात्राको मूल लक्ष्य भएको स्पष्ट पार्नुभएको छ।
सम्पर्क कार्यालय उद्घाटन तथा युवा–संवाद कार्यक्रममा बोल्दै उम्मेदवार विष्टले शहीद आयुष थापालाई केवल एउटा नाम होइन, नयाँ पुस्ताको विद्रोह, साहस र परिवर्तनको प्रतीकका रूपमा व्याख्या गर्नुभयो। उहाँले भन्नुभयो,“आयुष थापा यो पुस्ताको ढुकढुकी हुन्। उनले जुन व्यवस्था र न्यायका लागि आफ्नो जीवन अर्पण गरे, त्यसलाई संस्थागत गर्नु हाम्रो ऐतिहासिक दायित्व हो।”
विष्टले आजका युवाहरू गफ र आश्वासनभन्दा माथि उठिसकेको उल्लेख गर्दै ‘जेन–जी’ पुस्ता परिणाम, पारदर्शिता र प्रत्यक्ष कार्यान्वयन चाहने पुस्ता भएको बताउनुभयो। “हामी आयुषका सपनाहरूलाई भाषणमा होइन, वडाको नीति, बजेट र योजनामा समेटेर अगाडि बढ्नेछौँ,” उहाँको भनाइ थियो।
बाँके क्षेत्र नम्बर २ का युवाहरूले भ्रष्टाचारमुक्त समाज र स्वदेशमै रोजगारीको माग राखेका थिए । ती मागप्रति प्रतिबद्धता जनाउँदै विष्टले नेपाली कम्युनिष्ट पार्टी र आफ्नो चुनाव चिह्न ‘तारा’ ले विकास र सुशासनको नयाँ दिशाको नेतृत्व गर्ने दाबी गर्नुभयो ।
शहीद आयुष थापाका सहयात्री तथा स्थानीय युवाहरूले दिपेन्द्र विष्टको उम्मेदवारीलाई शहीदको सपनासँग जोडेर हेरेका छन्। एक स्थानीय युवाले भने,“हामीलाई यस्तो नेतृत्व चाहिएको छ, जसले शहीदको रगतको सम्मान गरोस् र युवालाई प्रविधिसँगै उत्पादन र रोजगारीमा जोडोस्।”
घरदैलो अभियानका क्रममा उम्मेदवार विष्टले शहीद आयुष थापाको परिवारसँग भेट गरी उहाँहरूबाट आशीर्वाद समेत लिनुभएको छ। सो अवसरमा उहाँले वडा नम्बर १ लाई शहीद आयुष थापाको सम्झनामा ‘नमुना शहीद ग्राम’ का रूपमा विकास गर्ने भावुक प्रतिबद्धता व्यक्त गर्नुभयो।
शहीदको सपना, युवाको आकांक्षा र जनताको भरोसा बोकेर दिपेन्द्र विष्ट बाँके–२ मा नयाँ राजनीतिक आशाको प्रतीक बन्दै अघि बढ्नुभएको छ।
