नेपालगन्ज। बाँके निर्वाचन क्षेत्र नम्बर २ मा नेपाली कम्युनिस्ट पार्टीका साझा उम्मेदवार दिपेन्द्र विष्ट ले आफ्नो घरदैलो अभियानलाई तीव्रता दिँदै वडा नम्बर २ का मतदातासँग प्रत्यक्ष भेटघाटलाई प्राथमिकता दिनुभएको छ ।
उहाँ यतिबेला घर–घरमा पुगेर मतदातासँग संवाद गर्दै उनीहरूको गुनासा सुन्ने, सुझाव संकलन गर्ने र अग्रज व्यक्तित्वहरूबाट आशीर्वाद लिने कार्यमा सक्रिय रहनुभएको छ। अभियानका क्रममा उम्मेदवार विष्टले क्षेत्रको समग्र विकासलाई केन्द्रमा राख्दै रोजगारी सिर्जना, गुणस्तरीय शिक्षा, सहज स्वास्थ्य सेवा र आधारभूत पूर्वाधार विकास लाई आफ्नो प्रमुख एजेन्डाका रूपमा प्रस्तुत गर्नुभएको छ ।
घरदैलो भेटघाटका क्रममा उहाँले भन्नुभयो,“हरेक घरको ढोका र हरेक मनको आवाज सुन्नु नै मेरो अभियानको मूल उद्देश्य हो। जनताको आवश्यकता र भावना अनुसार काम गर्ने जिम्मेवार नेतृत्व दिन म प्रतिबद्ध छु ।”
स्थानीय बासिन्दाहरूले पनि उम्मेदवारसँग प्रत्यक्ष संवाद गर्न पाएकोमा खुसी व्यक्त गरेका छन्। उनीहरूले आफ्ना समस्या खुलस्त राख्न पाउँदा आशा जागेको र विकास तथा सकारात्मक परिवर्तनको अपेक्षा बढेको प्रतिक्रिया दिएका छन् ।
घरदैलो अभियानसँगै बाँके–२ मा चुनावी माहोल क्रमशः तातिँदै गएको छ। उम्मेदवारहरूको सक्रियता बढ्दै जाँदा मतदातामाझ राजनीतिक चासो र उत्साह पनि उल्लेखनीय रूपमा बढेको देखिन्छ ।
