काठमाडौं । प्रतिनिधि सभाको बैठक माघ १६ आइतबार बस्दैछ । प्रतिनिभि सभाको बैठक पुस सात गते यता बस्न सकेको थिएन । बैठक भोली दिउँसो १ बजेका लागि तय भएको हो ।
यसअघि पुस १८ का लागि राखिएको बैठक माओवादी केन्द्रको राष्ट्रिय सम्मेलनका कारण स्थगित भएको थियो । पुस २२ गते नेकपा एमालेको बैठकका कारण बस्न सकेको थिएन । त्यसै गरी पुस २८ र माघ ३ का लागि बोलाइएको बैठक कोभिडका कारण बस्न सकेको थिएन ।
नेकपा एमालेले संसद् अवरोध कायम राखेको र कोरोना संक्रमण उच्च रहेको अवस्थामा माघ १६ मा बैठक बस्न लागेको हो । भोलि बस्ने प्रतिनिधि सभा बैठकको एजेण्डा के हुने र अर्को बैठक कहिले बस्ने भन्ने विषयमा छलफल गर्नका लागि आइतबार बिहान ११ बजे कार्य व्यवस्था परामर्श समितिको बैठक बोलाइएको छ ।
सभामुख अग्नि सापकोटाका प्रेस संयोजक श्रीधर न्यौपानेका अनुसार संसद्को एजेण्डा तय गर्न नयाँ बानेश्वरस्थित संसद् भवनको शंकर हलमा परामर्श समितिको बैठक बोलाइएको हो ।
