बाँके । नरैनापुर गाउँपालिका–४ का वडा सदस्य तथा गाउँ कार्यपालिकाका सदस्य सन्तोष कुमार श्रीवास्तवको उपचारका क्रममा भारतको लखनउमा असामयिक निधन भएपछि नरैनापुर गाउँपालिकाले गहिरो दुःख व्यक्त गर्दै सोमबार शोक बिदा दिने निर्णय गरेको छ।
गाउँपालिकाले आइतबार जारी गरेको शोक बिदा सम्बन्धी सूचनामा स्वर्गीय श्रीवास्तवप्रति हार्दिक श्रद्धाञ्जली अर्पण गर्दै शोकसन्तप्त परिवारजनप्रति गहिरो समवेदना व्यक्त गरेको जनाएको छ। 
सूचनामा श्रीवास्तव जनप्रिय, कर्मठ तथा समर्पित जनप्रतिनिधिका रूपमा परिचित रहेको उल्लेख गर्दै उहाँको असामयिक निधनबाट नरैनापुर गाउँपालिका र समग्र क्षेत्रलाई अपूरणीय क्षति पुगेको जनाइएको छ।
गाउँ कार्यपालिकाको आकस्मिक बैठकको निर्णयअनुसार असार २२ गते सोमबार गाउँपालिका कार्यालय तथा मातहतका सबै निकायमा अत्यावश्यक सेवाबाहेकका सम्पूर्ण सेवा बन्द रहने गरी शोक बिदा घोषणा गरिएको गाउँपालिकाले जनाएको छ ।
गाउँपालिका अध्यक्ष इश्तियाक अहमद शाह र प्रमुख प्रशासकीय अधिकृत नवराज वलीद्वारा हस्ताक्षरित सूचनामार्फत शोक बिदासम्बन्धी जानकारी सार्वजनिक गरिएको हो । गाउँपालिकाले स्वर्गीय श्रीवास्तवले जनसेवा र स्थानीय विकासमा पुर्याएको योगदानको स्मरण गर्दै उहाँप्रति उच्च सम्मान व्यक्त गरेको छ ।
