काठमाडौं । अनुमोदानका लागि संसदमा पेस भएको एमसीसी पारित गर्ने विषयमा सहमति खोज्न नेपाली काग्रेस र नेकपा एमाले छलफलमा जुटेका छन् ।
प्रधानमन्त्री तथा कांग्रेस सभापति शेरबहादुर देउवाको दिनभरको प्रयासपछि साँझ एमाले र कांग्रेस निर्णायक छलफलका लागि बालुवाटारमा भेला भएका हुन् । अहिले सत्ता नेतृत्व दल र प्रमुख प्रतिपक्षी दलबीच छलफल जारी छ ।
प्रधानमन्त्री देउवाले दिउँसो सत्तारुढ नेकपा माओवादी केन्द्रसँग छलफल गरेका थिए । माओवादीसँगको छलफलमा प्रधानमन्त्री देउवाले एमसीसी पास गर्न सहयोग नगर्ने भए गठबन्धनले निरन्तरता पाउन नसक्ने बताएका थिए ।
प्रधानमन्त्रीसँगको छलफल लगत्तै माओवादी र नेकपा एमालेबीच छलफल भएको थियो । उक्त छलफलमा एमाले अध्यक्ष केपी शर्मा ओलीले ‘एमसीसी पारित गर्ने वातावरण बनाउ’ भन्दै माओवादीसँग प्रस्ताव राखेका थिए । जवाफमा माओवादीले ‘संसदको जारी अवरोध हटाएर अघि बढौं’ भनेका थिए ।
एमसीसी पारित गर्ने सन्दर्भमा माओवादीको साथ खोजेका प्रधानमन्त्री देउवा र एमाले अध्यक्ष ओलीले प्रचण्डसँग छलफल गरेपछि साँझ निर्णायक छलफलको वातावरण बनाएका हुन् ।
माओवादीको धारणाबारे समीक्षा गरेर अघि बढ्ने एमाले र कांग्रेसको तयारीअनुरुप बालुवाटारमा बैठक तय भएको हो ।
सत्तारुढ माओवादी र एकीकृत समाजवादीले एमसीसी पारित गर्न सहयोग नगर्ने भएपछि प्रधानमन्त्री देउवा एमालेको साथमा एमसीसी पारित गर्ने तयारीमा लागेका हुन् ।
पछिल्लो केही धारणाहरुका अनुसार एमससीसी पारित गर्दै वर्तमान सत्ता गठबन्धन भत्काएर कांग्रेस–एमालको नयाँ गठबन्धन बनाउन देउवा र ओली जुटेका छन् ।
