बाँके । आगामी बैशाख ३० गते हुने स्थानीय तहको निर्वाचनमा सत्तारुढ पाँच दलिय गठबन्धन जसरी पनि एमाले हराउ अभियानमा लागेको छ । केन्द्रमा एमाले हराउ अभियान चलाएपनि स्थानीय तहमा भने त्यसको उल्टो भएको छ । गठबन्धन तोड्दै नेकपा माओवादी केन्द्र नेपालगन्ज उपमहानगरपालिकाले एक्लै चुनाव लड्ने घोषणा गरेको छ ।
नेपालगञ्ज उपमहानगरपालिकामा नेपाली कांग्रेस र जसपालाई प्रमुख पद दिएर तालमेल हुने ठहर गर्दै माओवादीले एक्लै निर्वाचनमा जाने निर्णय गरेको हो । नेकपा माओवादी केन्द्र नेपालगन्ज उपमहानगरपालिका समितिले पत्रकार सम्मेलन आयोजना गरि एक्लै चुनाव लड्ने जानकारी गराइएको हो ।
नेकपा माओवादी केन्द्र नेपालगन्ज समितिका अध्यक्ष रतन शाहीले माओवादी एक्लै चुनाव लड्न सक्षम भएकाले गठबन्धन भन्दा पनि एक्लै चुनावमा जाने निर्णय गरेको बताए । माओवादी कार्यकर्ताको भावनालाई सम्मान गर्दै आगामी निर्वाचनमा कुनै दलसँग तालमेल नगरी एक्लै चुनावमा जानुपर्ने भन्दै सोही अनुसार निर्णय गरेको नगर अध्यक्ष शाहीले बताए ।
गठबन्धनमा रहेका दलहरुले मेयर र उपमेयर बाहेक वडामा एक्लै चुनाव लड्न भने पछि माओवादीले अर्को दलको उम्मेदवारलाई स्विकार गर्न नसकिने भन्दै शाहीले पार्टीको अस्तित्व जोगाउन एक्लै निर्वाचनमा जाने तयारी भएको बताए ।
