बाँके । वडा प्रहरी कार्यालय नेपालगञ्जका नयाँ इन्चार्ज प्रहरी निरीक्षक शेखर खड्काले अबको काम गर्ने शैली ‘रियाक्टिभ’ होइन, ‘प्रो–एक्टिभ’ हुने बताएका छन् ।
भर्खरै नेपालगञ्ज सरुवा भई कार्यभार सम्हालेका खड्काले मंगलबार बिहान आफ्नो कार्यालयमा आयोजित पत्रकारहरूसँगको परिचयात्मक कार्यक्रममा बोल्दै प्रहरीले अब घटना घटेपछि होइन, घटना रोक्न अग्रसर हुने मनोवृत्ति अपनाउने बताए ।
उनले नेपालगञ्जको संवेदनशीलता र भौगोलिक विशेषता ध्यानमा राख्दै शान्ति–सुरक्षा कायम गर्न र अपराध नियन्त्रणमा प्रभावकारी पहल गर्ने प्रतिबद्धता जनाए ।
“हामी मिडियामैत्री ढंगले काम गर्छौं,” उनले भने, “सञ्चारकर्मीहरूबाट प्राप्त सूचना र सुझावलाई अपराध नियन्त्रण र जनसेवामा उपयोग गर्नेछौं ।”
निरीक्षक खड्काले सीमा अपराध नियन्त्रण, लागूऔषध रोकथाम, ट्राफिक व्यवस्थापन र सामुदायिक सहकार्यलाई प्रमुख प्राथमिकतामा राख्ने उल्लेख गर्दै सहज सूचना प्रवाह, समन्वय र सहकार्यका माध्यमबाट प्रहरी र समुदायबीच विश्वासको सम्बन्ध बलियो बनाउने संकल्प व्यक्त गरे ।
