राप्ती सोनारी । लैंगिक हिंसा विरुद्धको १६ दिने अभियान अन्तरगत राप्ती सोनारीमा सडक नाटक प्रर्दशन गरिएको छ । राप्ती सोनारी गाउँपालिका वडा नम्बर २ कचनापुरमा उक्त नाटक प्रर्दशन गरिएको हो ।
राप्ती सोनारी गाउँपालिका उपाध्यक्ष मनिसासिंह थारुले विश्वभरि नै महिला हिंसा बढिरहेको सन्दर्भमा लैंगिक हिंसा अन्त्यका लागि सबैले व्यक्तिगत र सामूहिकरुपमा निरन्तर लाग्नुपर्नेमा जोड दिनु भएको थियो । उहाले “लैंगिक हिंसाको अन्त्यका लागि विश्वका १६८ देशमा कानुन निर्माण भएको बताउँदै कानुनको प्रभावकारी कार्यान्वयनका लागि सबै सरोकारवालाको समन्वय र सहकार्य हुनुपर्ने” जिकिर गर्नु भयो । उपाध्यक्ष थारुले राप्ती सोनारीमा महिला माथि हुने बिभेदको अन्त्यका लागि स्थानीय नागरिकहरु संग छलफल गरेर अगाडी बढ्ने प्रतिबद्धता व्यक्त गर्नु भएको थियो ।
उपाध्यक्ष थसरुको सभापतित्वमा सम्पन्न उक्त कार्यक्रममा गाउँपालिकाका कार्यपालिका सदस्य केशव परियार, राप्ती सोनारी गाउँपालिका स्तरिय मानव अधिकार सञ्जालका अध्यक्ष धनी ओली लगायतले हिंसा अन्त्यका लागि सबैको हाथेमालो हुन जरुरी रहेको धारणा राख्नु भएको थियो । लैंगिक हिंसा विरुद्धको १६ दिने अभियान अन्तरगत गाउँपालिकामा विभिन्न कार्यक्रमहरु चलिरहेका छन् ।
