बाँके । बाँकेको जानकी गाउँपालिकाका अध्यक्ष एवं नेपाली कांग्रेसका महासमिति सदस्य छब्बन खाँको छातीमा देखिएको सङ्क्रमण लामो समयसम्म औषधि सेवन गर्दा पनि सुधार नआएपछि थप उपचारका लागि भारत लगिएको छ।
अध्यक्ष खाँलाई शुक्रबार राति भारतको इन्दु इन्स्टिच्युट अफ मेडिकल साइन्सेस, लखनउमा भर्ना गरिएको जानकी गाउँपालिकाका जिन्सी शाखा प्रमुख राजु यादवले जानकारी दिनुभयो। हाल त्यहाँ विशेषज्ञ चिकित्सकको निगरानीमा उहाँको उपचार भइरहेको बताइएको छ।
अध्यक्ष खाँ केही समयदेखि छातीको सङ्क्रमणबाट पीडित रहँदै आउनुभएको थियो। औषधि उपचार जारी रहे पनि अपेक्षित सुधार नदेखिएपछि उपचारमा संलग्न चिकित्सकले थप जाँच र उपचारका लागि बाहिर रिफर गर्न सुझाव दिएका थिए । सोही सिफारिसका आधारमा उहाँलाई लखनउ लगिएको सचिवालय सदस्य रब्बान शेखले जानकारी दिनुभयो।
मंगलबार मात्र फलोअप जाँचका लागि अस्पताल पुगेका अध्यक्ष खाँ घर फर्किनुभएको थियो। तर पुनः छातीमा समस्या देखिएपछि सोही दिन अस्पतालमा भर्ना गरिएको थियो। स्वास्थ्य अवस्थाको थप मूल्यांकनपछि विशेषज्ञ उपचारका लागि भारत लैजाने निर्णय गरिएको हो ।
अध्यक्ष खाँको स्वास्थ्य अवस्थाबारे थप विवरण आउन बाँकी रहेको गाउँपालिकाले जनाएको छ। स्थानीय तहको नेतृत्वमा रहँदै आएका खाँको शीघ्र स्वास्थ्य लाभको कामना गर्दै शुभेच्छुकहरूले सामाजिक सञ्जालमार्फत शुभकामना व्यक्त गर्न थालेका छन् ।
