बाँके । बाँके यूनेस्को क्लब र प्लान इंटरनेशनल नेपालको साझेदारीमा सञ्चालित हरित अर्थतन्त्र परियोजना अन्तर्गत पर्यावरण संरक्षण सम्बन्धी एकदिने तालिम सम्पन्न भएको छ।तालिममा वातावरण र हरित अर्थतन्त्रको महत्त्व, प्रदूषित वातावरणका कारण विश्व तापमान बढ्दै जानु र जलवायु परिवर्तन जस्ता नकारात्मक प्रभावहरूको बारेमा जानकारी गराइएको थियो । समुदाय स्तरमा वातावरण संरक्षणका लागि गर्नुपर्ने आवश्यक पहलहरू र विद्यमान पर्यावरणीय कानून तथा यसको प्रभावकारी कार्यान्वयनका महत्त्वका बारेमा सहजिकरण गरिएको थियो ।
सहभागीहरु तालिम प्रति निकै उत्साहित र उत्सुक देखिएका थिए। सहभागीहरुले आत्मनिर्भर र आर्थिक रूपमा सक्षम भई समाजमा सम्मानजनक जीवन जिउनका लागि हरित व्यापारमा संलग्न हुने इच्छा व्यक्त गरेका थिए भने समुदाय स्तरमा वातावरण संरक्षणमा योगदान पुर्याउन सचेतना फैलाउने समेत प्रतिबद्धता व्यक्त गरे ।
तालिममा बर्दिया राष्ट्रिय निकुञ्जका पूर्व प्रमुख संरक्षण अधिकृत रमेश कुमार थापा र कार्यक्रम अधिकृत राधे कृष्ण थारु र फिल्ड सुपरवाइजर कञ्चन दहितले सहजिकरण गर्नुभएको थियो ।
