बाँके । आगामी फागुन २१ गते हुने प्रतिनिधि सभा निर्वाचनलाई लक्षित गर्दै नेकपाका केन्द्रीय सदस्य तथा बाँके निर्वाचन क्षेत्र नम्बर २ का उम्मेदवार दिपेन्द्र बिष्टले चुनावी अभियानलाई तीव्र बनाएका छन्। अभियानलाई व्यवस्थित र प्रभावकारी बनाउन बिष्टले आफ्नै निवासमा चुनावी सचिवालय सञ्चालनमा ल्याएका छन्।
बाँके–२ मा निर्वाचन परिचालनलाई मजबुत बनाउने उद्देश्यसहित स्थापना गरिएको सचिवालयबाट राजनीतिक, संगठनात्मक र डिजिटल अभियान एकैसाथ सञ्चालन गरिनेछ। सचिवालयको नेतृत्व डा. डक्ट प्रसाद धिताल र प्रेस सेन्टर नेपाल बाँकेका अध्यक्ष चन्द्र बोहराले गर्ने छन्।
सचिवालय अन्तर्गत युवा परिचालन, रणनीति निर्माण तथा अन्य उपसमितिहरू गठन भइसकेका छन्। विशेषगरी डिजिटल अभियानलाई प्राथमिकतामा राख्दै फेसबुक, युट्युब र टिकटकजस्ता सामाजिक सञ्जालमार्फत सन्देश प्रवाह गर्न २० जनाको विशेष टोली खटाइएको छ।
यस्तै, राजनीतिक रूपमा महत्वपूर्ण निर्णय लिनका लागि छुट्टै विशेष टिम तयार गरिएको छ। मतदाताको सर्वेक्षण, क्लस्टरअनुसार रणनीति निर्माण तथा विभिन्न कार्यक्रमहरूको कार्यान्वयन यही सचिवालयबाट गरिने योजना रहेको छ।
व्यवस्थित संगठन, प्रविधिमैत्री अभियान र तथ्यमा आधारित रणनीतिसहित दिपेन्द्र बिष्ट बाँके–२ को चुनावी प्रतिस्पर्धामा सशक्त रूपमा उत्रिएको राजनीतिक विश्लेषकहरूको भनाइ छ ।
