बाँके । दिपावलीको उल्लाससँगै राप्ती सोनारी गाउँपालिका–७ सहिद दलबहादुर घर्ति मगर खेलमैदान हर्ष र हुटिङ्गले गुञ्जिएको छ । सातौं अन्तर सामुदायिक वन उपभोक्ता समितीस्तरीय वडा कप फुटबल प्रतियोगिताको उपाधि कुसुमीया सामुदायिक वन उपभोक्ता समितिले जितेपछि मैदान रमाइलो उत्सवस्थलमा रूपान्तरण भयो ।
प्रतियोगिताको फाइनलमा कुसुमीया सामुदायिक वनले मनडपवा सामुदायिक वन उपभोक्ता समितीलाई पराजित गर्दै विजेता बनेको हो । उपविजेता बनेको मनडपवा सामुदायिक वन उपभोक्ता समितिले पनि खेलमा उत्कृष्ट प्रदर्शन गर्दै दर्शकको मन जित्न सफल भयो ।
खेलको दौरान मोहन थारुले ८ वटा गोली गर्दै उत्कृष्ट खेलाडी घोषित हुँदै सम्मानित भए ।
विजेता टोलीका खेलाडीहरूलाई वडा अध्यक्ष रामलखन थारुले १५ हजार रुपैयाँ नगद, ट्रफी र प्रमाणपत्र प्रदान गर्नुभयो भने उपविजेता टोलीले ८ हजार रुपैयाँ नगद र प्रमाणपत्र प्राप्त गर्यो ।
विजेता टोलीका क्याप्टेन सुमिर पुनले खेलपश्चात् भने, “यो जित हाम्रो सामुदायिक एकताको प्रतीक हो। हामीले फुटबल मात्र खेलेका होइनौँ, हाम्रो गाउँको गर्व पनि बोक्यौँ।”
कार्यक्रमको समापन गर्दै वडा अध्यक्ष रामलखन थारुले भन्नुभयो, “यस्ता खेलकुदले युवामा अनुशासन, भाईचारा र एकताको भावना जागृत गर्छ । खेल मैदानमा देखिएको ऊर्जा गाउँको विकासमा प्रेरणा बन्नेछ।”
प्रतियोगितामा सात वटा सामुदायिक वन उपभोक्ता समितिहरूले सहभागिता जनाएका थिए।
दिपावलीको अवसरमा आयोजना गरिएको यो प्रतियोगिताले खेलकुदसँगै सामुदायिक एकता र उत्सवको सुन्दर सन्देश फैलाएको सहभागीहरूको भनाइ छ। कार्यक्रमको संचालन कालुराम थारुले गरेका थिए भने बिभिन्न राजनितिक दलका प्रतिनिधिहरुको सहभागिता रहेको थियो ।
