बाँके । नेपाली कांग्रेस बाँकेका पूर्व नेता तथा प्रजातान्त्रिक आन्दोलनका योद्धा पुर्व सांसद एंव हज समितिका पुर्व अध्यक्ष ८८ वर्षीय मेराज अहमद शाहको निधन भएको छ ।
नरैनापुर गाउँपालिका वडा नं. २ मा स्थायी रूपमा बस्दै आउनुभएका शाहको मंगलबार बिहान उपचारको क्रममा निधन भएको हो ।
मुटु तथा श्वासप्रश्वासमा समस्या भएपछि उहाँलाई भेरी अस्पतालमा उपचारका लागि भर्ना गरिएको थियो । उहाँ महिनादेखि नै थलिनु भएको थियो ।
शाहको निधन भएको थाहा पाएपछि नरैनापुर गाउँपालिकाका प्रशासकीय अधिकृत जनक लाल चौधरी लगायतका व्यक्तिहरु अस्पताल पुगेर श्रद्धाञ्जली अर्पण गर्नुभएको छ । बाँके जिल्लाको एक अथक योद्धा र आफूहरूको आदर्श पुरुषलाई गुमाएको नरैनापुर गाउँपालिकाका उपाध्यक्ष जयन्ती श्रीवस्तावले बताउनु भयो । निष्ठावान् नेताको रूपमा उहाँको पहिचान थियो ।
यसैगरी नरैनापुर गाउँपालिकाले शाहको निधन भएको शोकमा बुधबार सार्वजनिक बिदा दिने छ । प्रमुख प्रशासकीय अधिकृत चौधरीले आजै बैठक बसेर शोक बिदा गर्ने तयार गरेको बताउनु भयो ।
