काठमाडौं । प्रधानन्यायाधीश चोलेन्द्र शमशेर जबराको बहिर्गमनका लागि सर्वोच्च अदालतमा आन्दोलनरत न्यायाधीशहरूले तीन सदस्यीय टोली बनाएका छन् । प्रधानन्यायाधीशसँगको भेटमा गएका न्यायाधीशहरूले प्रधानन्यायाधीशको धारणासमेत बुझ्ने र त्यसबारे आन्तरिक छलफल गरी सोमबार थप रणनीति बनाइने जनाइएको छ ।
कसैले आन्दोलन गर्दैमा पदबाट नबाहिरिने अड्डी कसेका प्रधानन्यायाधीश जबरासँग वार्ताका लागि न्यायाधीशहरूले तीन सदस्यीय वार्ता टोली गठन गरेका हुन् ।
टोलीमा आइतवार मात्रै आन्दोलनमा समर्थन जनाउन आइपुगेका न्यायाधीशहरु सपना प्रधान मल्ल, अनिलकुमार सिन्हा र अर्का न्यायाधीश मनोजकुमार शर्मा रहेका छन् ।
यसैबीच न्यायाधीशहरुले चोलेन्द्रशमशेर जबराको सम्मानजनक बहिर्गमनकै पक्षमा रहेको निष्कर्षमा पुगेका छन् । न्यायाधीशहरुको बैठकले प्रधानन्यायाधीशले राजीनामा दिएर बहिर्गमन हुनु नै उपयुक्त निकास भएको ठहर गरेको छ । यसका लागि प्रधानन्यायाधीशले केही समय मागेको खण्डमा समय दिने निर्णयसमेत भएको बताइएको छ ।
आइतबार पनि इजलासमा नबसेका न्यायाधीशरुको छलफलले यस्तो निष्कर्ष निकालेका हुन न्यायाधीशहरुले सोमबार पनि मुद्दा नहेर्ने बताएका छन् ।
