बाँके । नेपालगञ्जस्थित सोफिया रेसिडेन्टल इङ्गलिस स्कुलका विद्यार्थी, शिक्षक तथा कर्मचारीले रसुवाको भोटेकोशी बाढीबाट प्रभावित नागरिकको राहत तथा उद्धारका लागि तीन लाख ४५ हजार ७७१ रुपैयाँ सहयोग गरेका छन् ।
गत भदौ १० गते रसुवाको भोटेकोशीमा आएको बाढीबाट प्रभावित नागरिकको सहयोगका लागि विद्यालयले विद्यार्थी, शिक्षक तथा कर्मचारीलाई स्वेच्छिक सहयोग गर्न आह्वान गरेको थियो । विद्यालयको आग्रहपछि विद्यार्थी तथा शिक्षकले स्वतःस्फूर्त रूपमा सहयोग रकम संकलन गरेका हुन् ।
विद्यार्थीले कक्षा शिक्षकमार्फत उपलब्ध गराएको रकमसहित संकलित तीन लाख ४५ हजार ७७१ रुपैयाँ आज विद्यालयमा आयोजित कार्यक्रममा निजी तथा आवासीय विद्यालय अर्गनाइजेसन नेपाल (प्याब्सन) बाँकेलाई हस्तान्तरण गरिएको हो । उक्त रकम प्याब्सन बाँकेमार्फत प्रधानमन्त्री दैवीप्रकोप उद्धार कोषमा जम्मा गरिने जनाइएको छ ।
विद्यालयका प्रधानाध्यापक सुरेश गुरुङले विपद्को समयमा पीडित नागरिकप्रति मानवीय संवेदना अभिव्यक्त गर्दै विद्यार्थीमा सामाजिक उत्तरदायित्वको भावना विकास गर्ने उद्देश्यले सहयोग अभियान सञ्चालन गरिएको बताउनुभयो ।
“हामीले शिक्षक तथा विद्यार्थीलाई आफ्नो इच्छाअनुसार बाढीपीडितका लागि सहयोग गर्न आग्रह गरेका थियौँ । उहाँहरूको स्वतःस्फूर्त सहभागिताबाट तीन लाख ४५ हजार ७७१ रुपैयाँ संकलन भयो,” उहाँले भन्नुभयो, “विद्यार्थीले देखाएको सहयोग र सद्भावले विद्यालय परिवारलाई थप उत्साहित बनाएको छ ।”
विद्यालय व्यवस्थापन समितिका अध्यक्ष केबी बसेलले विपद्का समयमा गरिएको सहयोग आर्थिक योगदान मात्र नभई पीडित नागरिकप्रतिको मानवीय दायित्व र सामाजिक ऐक्यबद्धताको अभिव्यक्ति भएको बताउनुभयो ।
“हाम्रा विद्यार्थीले आफ्नो क्षमता र इच्छाअनुसार गरेको सहयोगले उनीहरूमा सामाजिक उत्तरदायित्व र मानवीय सेवाको भावना विकास भएको देखाउँछ,” उहाँले भन्नुभयो, “यस अभियानमा सहभागी विद्यार्थी, अभिभावक, शिक्षक तथा कर्मचारी सबैप्रति विद्यालय व्यवस्थापनका तर्फबाट धन्यवाद व्यक्त गर्दछु ।”
विद्यालयकी संस्थापक एवं निर्देशक सुशिला बसेलले शिक्षाको उद्देश्य विद्यार्थीलाई पाठ्यपुस्तकको ज्ञानमा मात्र सीमित नराखी समाज र समुदायप्रतिको जिम्मेवारीबोध गराउनु पनि भएको बताउनुभयो ।
“विपद् कसैलाई भनेर आउँदैन । यस्तो कठिन अवस्थामा पीडितको दुःखमा साथ दिनुपर्छ भन्ने भावना बालबालिकामा विकास गर्नु आवश्यक छ,” उहाँले भन्नुभयो, “विद्यार्थीले स्वेच्छाले गरेको सहयोगले विद्यालयले दिने शिक्षा व्यवहारमै सामाजिक सेवासँग जोडिएको अनुभूति भएको छ ।”
विद्यालय व्यवस्थापन समितिका सदस्य डा. डम्बरप्रसाद धितालले विद्यार्थी अवस्थादेखि नै सहयोग, सहकार्य र सामाजिक सेवाको संस्कार विकास गर्न सके जिम्मेवार नागरिक निर्माणमा महत्वपूर्ण योगदान पुग्ने बताउनुभयो ।
“विपद्का बेला गरिएको सानो सहयोगले पनि पीडित परिवारका लागि ठूलो अर्थ राख्न सक्छ,” उहाँले भन्नुभयो, “विद्यालयले सञ्चालन गरेको यस अभियानले विद्यार्थीलाई मानवीय सेवा र सामाजिक उत्तरदायित्व व्यवहारमै सिक्ने अवसर दिएको छ ।”
चेक ग्रहण गर्दै प्याब्सन बाँकेका अध्यक्ष विकास बज्राचार्यले सोफिया रेसिडेन्टल इङ्गलिस स्कुलले विपद्का समयमा देखाएको सामाजिक उत्तरदायित्वको उच्च प्रशंसा गर्नुभयो ।
“प्राकृतिक विपद्का बेला शिक्षण संस्था समाजको अग्रपंक्तिमा उभिनुपर्छ भन्ने उदाहरण सोफिया स्कुलले प्रस्तुत गरेको छ,” उहाँले भन्नुभयो, “विद्यार्थीका साना–साना योगदानबाट ठूलो सहयोग जुटेको छ । यो रकम प्रधानमन्त्री दैवीप्रकोप उद्धार कोषमार्फत वास्तविक पीडितसम्म पुग्ने विश्वास लिएका छौँ ।”
अध्यक्ष बज्राचार्यले बाँके जिल्लाका अन्य निजी विद्यालयलाई पनि विपद्का समयमा यस्ता मानवीय अभियानमा सहभागी हुन आग्रह गर्नुभयो । विपद्को सामना र प्रभावित नागरिकको उद्धार तथा पुनःस्थापनाका लागि सामूहिक एकता र सहकार्य आवश्यक रहेको उहाँको भनाइ थियो ।
कार्यक्रममा प्याब्सन बाँकेका सचिव विज्ञान शाह र नेपालगञ्ज उपमहानगरपालिका अध्यक्ष मानबहादुर थापाले पनि सोफिया रेसिडेन्टल इङ्गलिस स्कुल परिवारको प्रशंसा गर्नुभयो । उहाँहरूले विपद्को समयमा शिक्षण संस्थाले मानवीय नेतृत्व प्रस्तुत गर्नु सकारात्मक र प्रेरणादायी कार्य भएको बताउनुभयो ।
विद्यालयमा हाल एक हजार एक सयभन्दा बढी विद्यार्थी अध्ययनरत छन् । विद्यालयले विद्यार्थीलाई शैक्षिक ज्ञानसँगै मानवीय संवेदना, सामाजिक उत्तरदायित्व, सहयोग र सहकार्यको संस्कार विकास गराउने उद्देश्यले विभिन्न सामाजिक गतिविधिमा सहभागी गराउँदै आएको जनाएको छ ।
रसुवाको भोटेकोशीमा आएको बाढीबाट प्रभावित नागरिकको सहयोगका लागि विद्यालय परिवारले गरेको आर्थिक योगदानले विपद्को समयमा शिक्षा क्षेत्रले निर्वाह गर्नुपर्ने सामाजिक दायित्व र मानवीय भूमिकालाई थप उजागर गरेको छ ।
