काठमाडौं । महानगर र उपमहानगरको भागबन्डा टुंगो लगाउन सत्ता गठबन्धनको बैठक आज पनि बस्दैछ । यहि वैशाख ३० गते हुने स्थानीय तहका निर्वाचनमा सत्तारूढ गठबन्धनले चुनावी तालमेल गरेर उमेदवार उठाउने सहमति गरिसकेको छ ।
महानगरपालिका र उपमहानगरपालिकाको विषयमा निर्णय गर्न सोमबार बसेको बैठक निष्कर्षविहीन बनेपछि गठबन्धनका शीर्ष नेताहरु आज पुनः छलफलमा बस्न लागेका हुन् ।
निर्वाचनमा तालमेल गरेर जाने सहमति गरे पनि दलहरुलाई महानगर र उपमहानगरको भागबन्डा मिलाउन सकस भइरहेको छ । सोमबार दिनभर छलफल भए पनि सहमति जुट्न सकेन ।
आजको बैठक प्रधानमन्त्री निवास बालुवाटारमा बिहान साढे ११ बजे सुरु हुनेछ । कांग्रेस नेता एवं सञ्चार तथा सूचना प्रविधिमन्त्री ज्ञानेन्द्रबहादुर कार्कीले हिजो (सोमबार)को बैठक सहमति नजिक पुगेको र आज अन्तिम रुप दिइने बताए ।
सत्तारूढ नेपाली कांग्रेस, नेकपा (माओवादी केन्द्र), नेकपा (एकीकृत समाजवादी), जनता समाजवादी पार्टी (जसपा) नेपाल, र राष्ट्रिय जनमोर्चाबीच महानगरपालिका र उपमहानगरपालिकाको टुङ्गो लगाउन सोमबार दिनभर पटकपटक बसेको बैठक विनानिष्कर्ष सकिएको थियो ।
