बाँके । रामनवमी पर्वको अवसरमा हिन्दू धर्मावलम्बीहरूले जिब्रो छेडेर नेपालगञ्जस्थित प्रसिद्ध शक्तिपीठ बागेश्वरी मन्दिरको दर्शन गरेका छन् ।
बागेश्वरी मन्दिरमा यसपटक डेढ सयभन्दा बढीले जिब्रो छेडेका छन् । पश्चिम नेपालको प्रसिद्ध शक्तिपीठ बागेश्वरी मन्दिरमा यक्ष र मोक्ष पाउने आशामा त्रिशूलले जिब्रो छेडेर माता बागेश्वरीको पूजा गर्ने परम्परा छ । नेपाल लगायत भारतका विभिन्न स्थानबाट चैते दसैँ र विजयादशमीको रामनवमीको अवसरमा बागेश्वरी मन्दिरमा आएर जिब्रो छेडेर दर्शन गर्ने परम्परा छ ।
चैते दशैं र बडा दसैँको नवमीको दिनमा जिब्रो छेडेर बागेश्वरी माताको दर्शन गर्नेको भिड नै लाग्ने गरेको छ । चैते दशैंंको नवरात्रादेखि निराहार व्रत बसेका पुरुषले जिब्रो छेडेर पूजाआजा गर्ने चलन परापूर्वकालदेखि नै चलेको छ । परम्परा धान्नको लागि नवरात्रको व्रत बसेर नवमीको दिनमा जिब्रो छेडेर बागेश्वरी माताको दर्शन गरिने गरिएको भक्तजनहरूको भनाई छ ।
मन्दिरका मूल महन्त चन्द्रनाथ योगीले नवरात्रको व्रत बसेका पुरुषले आफ्नो भाकल पूरा गराउन वा मागेको वर पूरा भएपछि बागेश्वरीलाई जिब्रो छेडेर चढाउने चलन परापूर्वकालदेखि नै चल्दै आएको बताउनुभयो । सतीदेवीको जिब्रो पतन भएको ठाउँ भएकाले बागेश्वरी मातालाई खुशी तुल्याउन जिब्रो छेड्ने गरेको जनविश्वास छ ।
