काठमाडौँ । नेकपा माओवादी केन्द्रका नेता तथा संघीय मामिला तथा सामान्य प्रशासन मन्त्री अमनलाल मोदीले पार्टीले गरेको निर्णय आफूलाई मान्य हुने बताएका छन् ।
बालुवाटारमा बसेको माओवादीको पदाधिकारी बैठकमा मन्त्रीको हैसियतमा सहभागी भएका उनले प्रधानमन्त्री तथा पार्टी अध्यक्ष प्रचण्डले गर्ने निर्णय आफूलाई मान्य हुने बताएका हुन् । उनले मन्त्री रहिरहन भने बस्ने र छाड्न भने बाहिरिने उनको भनाइ थियो ।
उनले बैठकमा बोल्दै आफूले तीन महिनाअघि नै राजीनामा बुझाएको र प्रधानमन्त्रीको आग्रहअनुसार मात्रै बसिरहेको बताएका थिए ।
‘कर्मचारीको घेराबन्दीमा परेपछि मैले त तीन महिनाअघि नै राजीनामा बुझाएको थिएँ । अध्यक्ष कमरेडले नै निजामती ऐन टुंगोमा पुर्याउनुपर्छ भनेर बसिरहेको हुँ’ मोदीको भनाइ उद्धृत गर्दै एक नेताले भने ।
उनले आफ्नो कुरा राखेर बाहिरिएपछि माओवादीले मोदीलाई सरकारबाट फिर्ता बोलाउने निर्णय लिएको छ ।
