बाँके । बाँकेको हिरमिनियामा सशस्त्र प्रहरीको कुटाइबाट एकजना सर्वसाधरण मानिसको कानको जाली फुटेको छ ।
डुडुवा गाउँपालिका–६ हिरमिनियास्थित सशस्त्रको विओपी कालाबन्जरमा कार्यरत सइ हर्क थापाको कुटाइबाट स्थानीय मनोरथ धोवीको वाँया कानको जाली फुटेको भेरी अस्पतालले जनाएको छ ।
डुडुवा–६ मा ऐलानी जग्गा अतिक्रमण गरी बसेकाहरुलाई हटाउने बिषयमा छलफल भइ रहेका बेला धोबीले प्रहरीलाई अपशब्द प्रयोग गरे पछि सइले कुटेको स्थानीयले बताए ।
कुटाइबाट कान असाध्यै दुखेपछि धोवीलाई उपचारका लागि भेरी अस्पतालमा पुर्याइएको थियो । चिकित्सकले कानको जाली फुटेको जानकारी दिएका छन् ।
विओपीका इन्चार्ज सशस्त्र प्रहरी निरीक्षक सन्तोष डाँगीले घटना स्वीकार गरेका छन् । उनले धोवीले जाड खाएर तथानाम बोल्न थालेपछि सई थापाले सम्झाउनेक्रममा घटना भएको दावी गरे । उनले घटनालाई सामान्यरुपमा लिँदै उपचार गरिदिने बताए ।
यता मानव अधिकारवादी संस्था मानव अधिकार संरक्षण तथा प्रवर्द्धन केन्द्रले घटनाको निन्दा गरेको छ । कानको जाली फुट्ने गरि यातना दिने सइलाई कानुन बमोजिम कारबाही गर्न र घाइतेलाई क्षतिपूर्ति सहित निशुल्क उपचारको व्यवस्था मिलाउन अपिल गरेको छ ।
