बाँके । राष्ट्रिय हात्ती पाईले रोग निवारण कार्यक्रम अन्तरगत आम औषधी सेवन कार्यक्रमलाई प्रभावकारी बनाउने बिषयमा बाँकेका पत्रकारहरु संग अन्तरक्रिया गरिएको छ ।
अभियान अन्तरगत यही फागुन २८ गतेदेखी हात्ती पाईले रोग विरुद्धको औषधी खुवाइँदैछ । पत्रकार अन्तरक्रियामा जिल्ला स्वास्थ्य कार्यालय बाँकेका प्रमुख धिरजंग शाहले अझैपनि हात्तीपाईले रोग विरुद्धको औषधी सर्वसाधारणले खान मन नगरेको बताउनुभयो । हात्तीपाईले रोग विरुद्धको औषधीका विषयमा विभिन्न खालका भ्रम रहेको उहाँको भनाई थियो ।
स्वास्थ्यकर्मीको प्रत्यक्ष निगरानीमा औषधी सेवन गरेमा कुनैपनि असर नगर्ने वरिष्ठ जनस्वास्थ्य अधिकृत शाहले बताउनु भयो । सरकारले राष्ट्रिय हात्तीपाईले रोग निवारण कार्यक्रम बाँकेमा विगत ११ वर्षदेखी सञ्चालन गर्दै आएको छ । यो कार्यक्रम ६ वर्षमा सम्पन्न हुनुपर्नेमा सर्बसाधारणले औषधी सेवन गर्न नमान्दा पछाडी सरेको हो ।
सर्बसाधारणलाई औषधी सेवनबारे बुझाउन नसकिदाँ राष्ट्रिय हात्तीपाईले रोग निवारण कार्यक्रम सफल हुनमा जटिलता थपिएको छ । सो क्रममा स्वास्थ्य कार्यालय बाँकेका दुर्गा गौतम, पत्रकार महासंघ बाँकेका सचिव कमल डाँगी लगायतले बोल्नुभएको थियो ।
