काठमाडौं । संसदबाट एमसीसी अनुमोदन भएपछि नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले देश दुर्घटनाबाट बचेको बताएका छन् । आफ्नै निवास खुमलटारमा सोमबार दिउँसो पत्रकार सम्मेलन गर्दै प्रचण्डले यस्तो बताएका हुन् ।
एमसीसी व्याख्यात्मक घोषणासहित पारित भएकोमा आफू निकै खुसी भएको उनले बताए । आफूले सुरूदेखि नै एमसीसीमा राष्ट्रिय सहमति होस् भन्ने चाहना रहेकाले एमसिसी पारित हुँदा खुसी भएको बताए ।
शान्ति सम्झौताका बाँकी काम, लोकतन्त्र र संविधान नै खतारामा जाने अवस्था बनेपछि आफूले एमसीसी पारित गर्न सहमति भएको उनले बताए । उनले भने, ‘राष्ट्रिय सहमति बनोस भनेर लागे तर भएन । यसले त शान्ति प्रक्रिय, संविधान र लोकतन्त्र खतरा पर्ने देखेँ’ उनले भने,‘ त्यसैले यो निर्णयमा पुगिएको हो ।’
उनले एमसीसीलाई संसदबाट संकल्प प्रस्ताव पारित गर्ने नेकपाकालमा नै प्रस्ताव गरेको तर त्यो बेला तत्कालिन प्रधानमन्त्री केपी शर्मा ओलीले अस्वीकार गरेको आरोप लगाए । उनले भने, ‘नेकपाको सरकार भएको बेलामा विवादित हुन पुग्यो । एमसीसीलाई आईपीएसको अंग भनेर प्रचार गरियो । अमेरिकाका अधिकारी लगायतले पनि भने ।’
