बाँके। आज राष्ट्रिय बाल दिवस देभैभर बालबालिकाको क्षेत्रमा काम गर्ने सरकारी तथा गैरसरकारी संघसंस्थाले विभिन्न कार्यक्रम गरी मनाउँदैछन् ।
यस वर्षको बालदिवसको नारा "बालमैत्री समाजको आधारः जिम्मेवार परिवार, उत्तरदायी सरकार।"भन्ने मूल नाराका साथ मनाइँदै छ ।
नेपालले संयुक्त राष्ट्रसंघको बाल अधिकार महासन्धिलाई २०४७ साल भदौ २९ गते अनुमोदन गरेको थियो । सोही दिनको स्मरणमा हरेक वर्ष भदौ २९ गतेलाई राष्ट्रिय बाल दिवसको रुपमा मनाइँदै आएको छ ।
दिवसका अवसरमा शुभकामा दिँदै नरैनापुर गाउँपालिका अध्यक्ष इस्तियाक अहमद शाहले बालबालिकाको शिक्षा, स्वास्थ्यलगायतका अधिकार सुनिश्चित गर्ने कार्यलाई नरैनापुर गाउँपालिकाले प्राथमकितामा राखेको बताउनु भएको छ ।
उहाँले शिक्षामा सबैको पहुँच पुर्याउने गरि योजना ल्याउने प्रतिवद्धता व्यक्त गर्दै निरक्षरता विरुद्ध अभियान चलाउने क्रममा नरैनापुर गाउँपालिकले बालअधिकारको पहिलो पाइलाको रुपमा आधारभूत तहको शिक्षालाई थप गुणस्तरीय बनाएको उल्लेख गर्दै शिक्षामा पहुँच बढाउन बस र निःशुल्क शिक्षा संचालन गर्दै आएको जिकिर गर्नु भयो।
पढ्ने अवसरबाट कुनै पनि बालबालिका वञ्चित हुन नपरोस् भन्ने कुरामा नरैनापुर गाउँपालिका सचेत रहेको उल्लेख गर्दै लक्षित वर्ग केन्द्रित छात्रवृत्ति, दिवा खाजा र विद्यार्थीमैत्री पाठ्यक्रमको व्यवस्था गर्ने नीति लागू गरिएको समेत शुभकामनामा उल्लेख गर्नु भएको छ ।
