बर्दिया । स्वतन्त्र युवा सञ्जाल बर्दियाको संयोजनमा पूर्वमन्त्री अब्दुल खानको प्रमुख आतिथ्यतामा “जनतासँग, प्रतिनिधिको हिसाब–किताब” कार्यक्रम आज गुलरिया नगरपालिकाको जि.वि.स. सभाहलमा भव्य रूपमा सम्पन्न भएको छ।
कार्यक्रममा पूर्वमन्त्री खानले आफ्ना संसदीय र कार्यकारी कार्यकालका उपलब्धिहरूको विस्तृत विवरण जनतासामु प्रस्तुत गर्दै भने, “सामाजिक एकता र सहकार्यकै माध्यमबाट मात्र समृद्ध नेपाल निर्माण गर्न सकिन्छ।” उनले जनताको विश्वास र समर्थनका कारण आफूले बर्दियाको हितका लागि संसददेखि 
मन्त्रालयसम्म निरन्तर आवाज उठाउँदै आएको उल्लेख गरे।
खानले ३२ महिना २० दिनको कार्यकालमा बर्दियाको विकासका लागि गरेका पहलहरूको सार्वजनिक रूपमा हिसाबकिताब पेस गरेर ऐतिहासिक दृष्टान्त स्थापना गरेका छन्। उपस्थित नागरिकहरूका अनुसार बर्दियाको इतिहासमा पहिलो पटक कुनै जनप्रतिनिधिले जनतासामु खुला रूपमा आफ्नो कार्यकालको लेखाजोखा पेस गरेका हुन्।
कार्यक्रममा विभिन्न सामाजिक अगुवा, संघ–संस्था, राजनीतिक दलका प्रतिनिधि र स्थानीय नागरिकहरूको उल्लेखनीय सहभागिता रहेको थियो। ब्राह्मण, लोध, वर्मा, मुस्लिम, यादव, थारू, दलित र पहाडी समुदायका अगुवाहरूले पूर्वमन्त्री खानको कार्यशैली र पारदर्शिताको सराहना गर्दै उनलाई “आशा र भरोसाको प्रतीक युवा नेतृत्व” का रूपमा स्वागत गरेका थिए।
सामाजिक एकता, पारदर्शिता र उत्तरदायित्वका आधारमा देशलाई स्थायित्व र समृद्धिको दिशामा अघि बढाउनुपर्ने सन्देशसहित कार्यक्रम सम्पन्न गरिएको आयोजकहरूले जानकारी दिएका छन्।
