नेपालगन्ज । बाँके निर्वाचन क्षेत्र नं. २ मा चुनावी माहोल नयाँ चरणमा प्रवेश गरेको छ । सामाजिक सञ्जालदेखि चोक–चौराहा, कलेजदेखि समुदायसम्म जेन-जी युवाहरूको संगठित समर्थन प्रतिनिधि सभा सदस्य पदका उम्मेदवार दिपेन्द्र बिष्टतर्फ केन्द्रित हुँदै गएको देखिएको छ । युवाहरूले यो समर्थन भावनामा होइन, विचार, नीति र भविष्यसँग जोडेर अघि बढाएको बताएका छन् ।
जेनजी पुस्ताका प्रमुख सरोकार—रोजगारी, सीप विकास, उद्यमशीलता, गुणस्तरीय शिक्षा, प्रविधिको उपयोग र पारदर्शी शासन—माथि उम्मेदवार बिष्टले खुला र स्पष्ट संवाद गरेपछि युवाहरू थप विश्वस्त बन्दै गएको उनीहरूको भनाइ छ । “हामी नाराभन्दा समाधान खोज्छौँ,” युवाहरूको साझा धारणा छ, र यही अपेक्षासँग बिष्टको दृष्टिकोण मेल खाएको उनीहरूले बताएका छन् ।
युवासँगको छलफलमा उम्मेदवार दिपेन्द्र बिष्टले राजनीतिलाई अवसर होइन, जिम्मेवारीको रूपमा बुझ्नुपर्ने धारणा राख्नुभयो । उहाँले स्थानीय स्तरमै रोजगारी सिर्जना, साना तथा नवप्रवर्तनमुखी व्यवसायको प्रवर्द्धन, सीपमूलक तालिम र डिजिटल अवसर विस्तारलाई प्राथमिकतामा राख्ने प्रतिबद्धता व्यक्त गर्नुभयो । “युवाको भविष्य सुरक्षित नभएसम्म देशको भविष्य सुरक्षित हुँदैन,” उहाँको भनाइ थियो ।
जेनजी युवाहरूले बिष्टलाई सुन्ने, बुझ्ने र व्यवहारिक समाधान प्रस्तुत गर्ने नेताका रूपमा हेरेका छन् । सरल शैली, स्पष्ट सोच र युवामैत्री दृष्टिकोणकै कारण युवाहरू स्वतःस्फूर्त रूपमा संगठित हुँदै अभियानमा जोडिन थालेका छन् ।
बाँके निर्वाचन क्षेत्र नं. २ मा देखिएको यो युवा लहर केवल चुनावी समर्थन मात्र नभई, राजनीति बदल्ने चाहनाको सशक्त अभिव्यक्ति बनेको छ । विश्लेषकहरूका अनुसार जेनजी को सक्रिय सहभागिताले चुनावी नतिजामा मात्र होइन, भोलिको राजनीतिक संस्कार र नेतृत्व निर्माणमा समेत गहिरो प्रभाव पार्ने संकेत देखाएको छ ।
