काठमाडौं । प्रधानमन्त्री वालेन्द्र शाहले नेपाली सेनाका नवआयुक्त अधिकृतहरूलाई कर्तव्यनिष्ठ, अनुशासित र जिम्मेवार भएर राष्ट्रसेवामा समर्पित हुन आग्रह गर्नुभएको छ।
भक्तपुरको खरिपाटीस्थित नेपाली सैनिक प्रतिष्ठानमा आज आयोजित अधिकृत क्याडेट तालिमको आयुक्त पद प्रदान कवाज समारोहलाई सम्बोधन गर्दै प्रधानमन्त्री शाहले करिब ३६ महिनाको कठिन तथा चुनौतीपूर्ण प्रशिक्षण सफलतापूर्वक पूरा गरेका क्याडेटहरूलाई बधाई तथा शुभकामना व्यक्त गर्नुभयो।
उहाँले नवआयुक्त अधिकृतहरूलाई मातृभूमि र जनताप्रति पूर्ण समर्पणका साथ आफ्नो जिम्मेवारी निर्वाह गर्न आग्रह गर्दै सैनिक जीवनमा अनुशासन, आचरण र ‘चेन अफ कमान्ड’को पालना अत्यन्त महत्वपूर्ण हुने बताउनुभयो।
प्रधानमन्त्री शाहले भन्नुभयो, “सैनिक सेवामा प्रवेशसँगै तपाईँहरूको काँधमा राष्ट्रको सुरक्षा, सार्वभौमिकता र जनताको भरोसा जोडिएको छ। त्यसैले सदैव कर्तव्यप्रति सजग, अनुशासित र जिम्मेवार रहनु आवश्यक छ।”
उहाँले फरक–फरक सामाजिक तथा भौगोलिक पृष्ठभूमिबाट आएका जवानहरूको नेतृत्व गर्दै एकीकृत, सक्षम र परिणाममुखी टोली निर्माणमा नवआयुक्त अधिकृतहरू सफल हुने विश्वास व्यक्त गर्नुभयो।
प्रधानमन्त्रीका प्रेस सल्लाहकार दीपा दाहालका अनुसार समारोहमा नवआयुक्त अधिकृतहरूको उत्साह, समर्पण र नेतृत्व क्षमताको प्रशंसा गर्दै प्रधानमन्त्री शाहले सेनाको गौरवशाली परम्परालाई थप उचाइमा पुर्याउन आग्रह गर्नुभएको थियो।
समारोहमा सैनिक अधिकारी, प्रशिक्षक, अभिभावक तथा विशिष्ट व्यक्तिहरूको उपस्थिति रहेको थियो। 
