बाँके । नरैनापुर गाउँपालिकामा सामाजिक सद्भाव बिथोल्ने खालका अभिव्यक्तिहरू सार्वजनिक भएपछि विवाद चर्किएको छ। स्थानीय ‘जेनजी’ युवा नेता राज खानले सामाजिक सञ्जालमार्फत कडा प्रतिक्रिया जनाउँदै सम्बन्धित व्यक्तिमाथि कानुनी कारबाहीको माग गरेका छन् ।
राज खानका अनुसार नरैनापुर–६ निवासी तथा जय किसान माध्यमिक विद्यालय व्यवस्थापन समितिका अध्यक्ष अम्बर लाल मौर्यले पछिल्लो केही दिनदेखि सामाजिक सञ्जालमार्फत साम्प्रदायिक सद्भाव खल्बल्याउने गरी लक्षित अभिव्यक्तिहरू राख्दै आएका छन्। उनले यस्ता गतिविधिले समाजमा द्वन्द्व र असहिष्णुता फैलाउने खतरा बढाएको बताएका छन्।
खानले आफ्नो सामाजिक सञ्जाल पोस्टमार्फत यस्ता अभिव्यक्तिलाई कानुनविपरीत रहेको उल्लेख गर्दै तत्काल अनुसन्धान गरी मौर्यमाथि आवश्यक कारबाही गर्न जिल्ला प्रहरी कार्यालय बाँकेसँग माग गरेका छन् ।
नेपालको प्रचलित कानुनअनुसार कुनै पनि समुदाय, जाति वा धर्मविरुद्ध घृणा फैलाउने, द्वेषपूर्ण अभिव्यक्ति दिने कार्य दण्डनीय अपराध मानिन्छ। यस्ता गतिविधि सामाजिक सद्भाव खल्बल्याउने तथा सार्वजनिक शान्ति भंग गर्ने कसुरअन्तर्गत कारबाहीको दायरामा पर्ने कानुनी प्रावधान रहेको छ।
स्थानीय स्तरमा बढ्दो तनावलाई मध्यनजर गर्दै प्रशासनले घटनाप्रति गम्भीर ध्यान दिनुपर्ने माग पनि उठ्न थालेको छ। सरोकारवालाहरूले समयमै निष्पक्ष छानबिन गरी दोषीलाई कानुनी दायरामा ल्याउनुपर्नेमा जोड दिएका छन् ।
यस विषयमा बाँके प्रहरीले सुक्ष्म रुपमा अनुसन्धान सुरु गरि सकेको प्रहरी स्रोतले जनाएको छ । स्थानीयहरु मौर्यलाई पदबाट तत्काल बर्खास्त गर्न समेत गाउँपालिका संग माग गरेका छन् । गाउँपालिका अध्यक्ष शैयद इस्तियाक अहमद शाहले नरैनापुरको सदभाव बिथोल्न खोज्नेहरुलाई कारवाहीको दायरामा ल्याउने बताउदै मौर्यलाई पदबाट बर्खास्त गर्न माग उठेकोले सो बिषयमा अध्ययन गरि अगाडि बढ्ने जानकारी दिनु भयो ।
