काठमाडौँ । सरकारले हालै रसुवा जिल्लामा आएको बाढीमा परि मृत्यु हुनेको परिवारलाई राहत तथा घाइतेहरूलाई उपचारको व्यवस्था गर्ने निर्णय गरेको छ ।
राष्ट्रिय विपद जोखिम न्युनिकरण तथा व्यवस्थापन प्राधिकरणले आज सिंहदरबारमा रसुवामा आएको बाढि तथा क्षतिबारे जानकारी दिन आयोजित पत्रकार भेटघाटमा प्राधिकरणका कार्यकारी प्रमुख दिनेश प्रसाद भट्टले बाढीमा परी मृत्यु हुनेको परिवारलाई २ लाखका दरले राहत रकम उपलब्ध गराइने र घाइतेहरूको स्वास्थ्य मन्त्रालयमार्फत उपचारको व्यवस्था मिलाउने विपद् कार्यकारी परिषद्ले निर्णय गरेको बताउनुभयो ।
हिजो बसेको विपद् कार्यकारी परिषद्को बैठकले नेपाल–चीन जोड्ने मितेरी पुलको पुनर्निर्माण तथा सञ्चालनका लागि पुनः चीन सरकारसँग अनुरोध गर्ने र क्षति पुगेको अन्य पुर्वाधारहरुको सम्बन्धित मन्त्रालयमार्फत पुनर्निर्माणको कार्य तत्काल अघि बढाउने निर्णय गरेको पनि प्रमुख भट्टले जानकारी दिनुभयो ।
कार्यकारी प्रमुख भट्टले बाढीको कारण पहिचान गर्न विस्तृत अध्ययन गर्ने, भविष्यमा पूर्व सूचना र पुर्वतयारी सुनिश्चित गर्न चीनसँग आवश्यक समन्वय गर्ने पनि बताउनुभयो ।
पत्रकार भेटघाटमा रसुवा बाढीमा परी ९ जनाको मृत्यु, १९ जना बेपत्ता र एक जना घाइते रहेको र बाढीले २४ वटा कन्टेनर ट्रक, ३५ वटा विद्युतीय बस बगाउनुका साथै चीनसँग जोड्ने महत्वपूर्ण दुई पुलमा क्षति पुगेको जानकारी दिइएको छ ।
हालसम्म बाढीमा परेका ५७ जनाको सुरक्षाकर्मी परिचालनद्वारा र ३१ जनाको हेलिकप्टरमार्फत आपतकालिन उद्धार गरिएको छ ।
यस्तै असार २४ गते बिहान रसुवाको ल्हेन्दे र केरुङ खोलामा अचानक आएको बाढि कुनै भारी बर्षाले नभई हिमताल फुट्नुको कारण भएको प्रारम्भिक अनुमानले देखाएको पनि प्राधिकरणले बताएको छ ।
