काठमाडौं । प्रधानमन्त्री तथा नेपाली कांग्रेसका सभापति शेरबहादुर देउवा, नेकपा एमाले अध्यक्ष केपी ओली र माओवादी केन्द्रका अध्यक्ष पुष्पकमल दाहाल ‘प्रचण्ड’बीच प्रधानमन्त्रीको सरकारी निवास बालुवाटारमा छलफल जारी छ ।
एमसीसीबारे निर्णायक छलफलमा जुटेका प्रधानमन्त्री देउवाले प्रमुख प्रतिपक्षी दल नेकपा एमालेका अध्यक्ष केपी शर्मा ओलीलाई छलफलमा बोलाएका हुन् । त्यसैगरी एमसीसी पारित गर्न राष्ट्रिय सहमति आवश्यक हुने भएकाले सत्तारुढ दलका नेता प्रचण्डलाई पनि उक्त बैठकमा सहभागी गराएका हुन ।
मुख्य तीन दलका अध्यक्षबीच स्थानीय तहको निर्वाचनका सन्दर्भमा पनि छलफल चलिरहेको छ । आगामी जेठ ४ गते एकै चरणमा स्थानीय तहको निर्वाचन गर्ने सन्दर्भमा सबै दल सहमत भएता पनि आवश्यक छलफल गरेर मात्र मिति घोषणा गर्ने तयारीमा रहेका प्रधानमन्त्री देउवाले ओली र प्रचण्डसँग निर्वाचनबारे छलफल गर्न चाहेका हुन् ।
ओली र प्रचण्डसँग छलफल गरेर स्थानीय तह निर्वाचनको मिति घोषणा गर्ने सरकारको तयारी रहेको छ ।
