बाँके । नेपाली कम्युनिस्ट पार्टीका नेता भीम रावलले जेन–जी आन्दोलनको मूल आत्मालाई विपरीत जाने गरी ७३ वर्षीया सुशीला कार्कीलाई अन्तरिम सरकारको प्रधानमन्त्री बनाइएको भन्दै कडा आपत्ति जनाउनुभएको छ। नेपालगञ्जमा आयोजित पत्रकार सम्मेलनमा बोल्दै रावलले युवाको नेतृत्व माग्दै भएको आन्दोलनको सार नै उपेक्षित भएको टिप्पणी गर्नुभयो।
रावलले भन्नुभयो, “१३ देखि २८ वर्षका युवाले भूमिका खेल्नुपर्छ भनेर नारा लगाइयो, तर त्यसको बिलकुलै विपरीत परिणाम आयो। लामो समय राज्यका उच्च तहमा बसेर सुविधा भोग्दै, निवृत्तिभरण लिँदै, सन्तानलाई विदेश पठाएर घरमै आराम गरिरहनुभएका व्यक्तिलाई प्रधानमन्त्री बनाउनु भनेको युवा आन्दोलनको भावना नमेटाइचाहिँ के हो ?”
प्रधानमन्त्री कार्कीको पृष्ठभूमि र नियुक्ति प्रक्रियामाथि प्रश्न उठाउँदै रावलले यो निर्णयले युवाले व्यक्त गरेको अपेक्षा र विश्वासमाथि प्रहार गरेको दाबी गर्नुभयो।
अर्थमन्त्रीको प्रसंग जोड्दै उहाँले पूर्व अर्थसचिवसमेत रहेका अर्थमन्त्रीले हाल गरिरहेका कार्यहरूले नेपालको स्वाधीनता र राष्ट्रिय अस्मितामाथि नकारात्मक प्रभाव पार्ने आशंका व्यक्त गर्नुभयो। “सरकार राष्ट्रिय हितविपरीतका सम्झौतामा हतार–हतार देखिन्छ, तर आन्तरिक सुरक्षा र सुशासनका संवेदनशील विषयमा अत्यन्तै उदासीन छ,” रावलको आरोप थियो।
त्यसैगरी उहाँले पूर्वप्रधानमन्त्री केपी शर्मा ओलीले सिंहदरबारमा गएर ‘९ महिना बेडमै आराम गरेको’ टिप्पणीको प्रसंग स्मरण गर्दै, अरूलाई ‘बृद्धाश्रम–युवा आश्रम’ जस्ता टिप्पणी गर्नुको कुनै तुक नभएको प्रतिक्रिया दिनुभयो।
पत्रकार सम्मेलनमा रावलले सरकारले युवाको भावना आत्मसात् गर्न नसकेको र निर्णयहरू राष्ट्रहितमा केन्द्रित हुन नसकिरहेको भनाई राख्नु भएको थियो ।
