बाँके । बैजनाथ गाउँपालिकाले ‘किसानसँग पालिका अध्यक्ष’ कार्यक्रमअन्तर्गत ७० प्रतिशत अनुदानमा कृषि औजार वितरण गर्दै कृषि यान्त्रिकीकरणतर्फ ठोस कदम चालेको छ। गाउँपालिका अध्यक्ष प्रकाशबहादुर शाहीको नेतृत्वमा १०२ जना कृषकलाई मिनि पावर टेलर, १२० जना किसानलाई २, ३ र ४ इन्चका प्लास्टिक कटन पाइप वितरण गरिएको छ। यसबाहेक २१ जनालाई पावर टेलर, ११ जनालाई ई-लोडिङ्ग रिक्सा, ८४ जनालाई चाप कटर घाँस काट्ने मेसिन, ७२ जनालाई लालटिन मोटर, २२ जनालाई डिजल पम्पसेट तथा ३० जनालाई पेट्रोल पम्पसेटसमेत वितरण गरिएको कृषि विकास शाखाले जानकारी दिएको छ।
औजारको प्रयोगले किसानलाई के फाइदा ?
यी कृषि उपकरणले किसानको परिश्रम कम गर्ने, उत्पादन लागत घटाउने र उत्पादन बढाउने कार्यमा उल्लेख्य योगदान गर्ने विश्वास लिइएको छ।
मिनी पावर टेलर प्रयोगले हलो जोत्ने परम्परागत श्रमप्रधान विधिलाई यान्त्रिक विधिमा परिवर्तन गरेर खेत तयारी छिटो, सस्तो र प्रभावकारी बनाउँछ।
कटन पाइप मार्फत सिँचाइ व्यवस्था सुधार भई वर्षभरि खेती सम्भव हुनेछ।
चाप कटर घाँस काट्ने मेसिनले पशुपालन व्यवसायलाई सहयोग गर्दै पशु आहार व्यवस्थापन सहज बनाउँछ।
डिजल तथा पेट्रोल पम्पसेटले सिंचाइको दायरा फराकिलो बनाउनेछ भने
ई-लोडिङ्ग रिक्साले उत्पादन वस्तु बजारसम्म पु-याउन सहजता ल्याउनेछ।
संघीय र प्रदेशको ५०% अनुदानलाई ७०% मा विस्तार
अध्यक्ष शाहीका अनुसार, “किसान गरीब छन्, मेहनती छन्। उत्पादन नगरे किसानले, हाम्रो चुलो पनि बल्दैन। त्यसैले हामीले संघीय र प्रदेश सरकारले दिएको ५०% अनुदानलाई नीतिगत व्यवस्था गर्दै गाउँपालिकाले ७०% मा विस्तार गरेका छौं।”
उहाँले भविष्यमा यसलाई क्रमशः ८०%, ९०% हुँदै १००% पुर्याउने लक्ष्य समेत सार्वजनिक गर्नुभयो। “किसानसँगै बैजनाथ थारुको सपना पनि समृद्ध किसान हो, त्यो सपना हामी पुरा गर्छौं,” अध्यक्ष शाहीको दृढ भनाइ थियो।
स्थानीय सरकारको प्रत्यक्ष हस्तक्षेप
गाउँपालिका कृषि विकास शाखा प्रमुख प्रमोद कुमार विश्वकर्माका अनुसार, “उत्पादनदेखि बजारीकरणसम्म स्थानीय सरकारले किसानलाई साथ दिने प्रतिवद्धता जनाउँदै आएको छ।” उहाँका अनुसार, यस्ता यान्त्रिक सहयोगले एकातर्फ बैजनाथका खेतबारी यान्त्रिक बनाउने छन् भने अर्कोतर्फ किसानको जीवनशैलीमा सकारात्मक परिवर्तन ल्याउने छन्।
निष्कर्ष
कृषकको जिउ दुख्ने र उब्जनी न्यून हुने समय अब विदा लिनेछ। ७०% अनुदानमा वितरण गरिएका औजारले बैजनाथलाई आधुनिक कृषितर्फ उन्मुख गराउने विश्वास स्थानीय तहले लिएको छ। यदि नीतिगत रूपले निरन्तरता दिइयो भने, बैजनाथ कृषि क्रान्तिको उदहारण बन्न सक्नेछ।
