बाँके । बाँकेको सीमावर्ती नरैनापुर क्षेत्रमा आर्थिक गतिविधिको नयाँ आशा पलाएको छ । नेपाल सरकारले नरैनापुरमा छोटी भन्सार कार्यालय स्थापना गर्ने सम्बन्धी सूचना राजपत्रमा प्रकाशित गरेसँगै स्थानीयवासी उत्साहित बनेका छन् ।
लामो समयदेखि सीमावर्ती क्षेत्रका बासिन्दाले उठाउँदै आएको मागलाई सम्बोधन गर्दै सरकारले नरैनापुर छोटी भन्सारलाई पुनः सञ्चालनमा ल्याउने प्रक्रिया औपचारिक रूपमा अगाडि बढाएको हो । सरकारले देशभर सञ्चालनमा ल्याइने १८ वटा छोटी भन्सारको सूचीमा नेपालगञ्ज भन्सार कार्यालय अन्तर्गत पर्ने नरैनापुर छोटी भन्सारलाई समेत समावेश गरेको छ ।
भन्सार कार्यालय सञ्चालनमा आएपछि सीमापार व्यापार सहज हुने, स्थानीय बजार चलायमान बन्ने, राजस्व संकलन बढ्ने तथा रोजगारीका अवसर विस्तार हुने अपेक्षा गरिएको छ । सीमावर्ती क्षेत्र भएकाले दैनिक उपभोग्य सामग्रीदेखि कृषि उत्पादनसम्मको कारोबारमा प्रत्यक्ष लाभ पुग्ने स्थानीयको विश्वास छ ।
नरैनापुर गाउँपालिकाका अध्यक्ष इस्तियाक अहमद शाहले लामो समयदेखि बन्दप्रायः अवस्थामा रहेको भन्सार पुनः सञ्चालनमा आउनु नरैनापुरका लागि ठूलो उपलब्धि भएको बताउनुभयो । उहाँले भन्सार सुचारु भएपछि स्थानीय व्यापार व्यवसायले गति लिने र आर्थिक गतिविधिमा उल्लेखनीय सुधार आउने विश्वास व्यक्त गर्नुभयो ।
त्यस्तै, गाउँपालिकाका प्रमुख प्रशासकीय अधिकृत नवराज वलीले नरैनापुर नाकाको स्तरोन्नति र आवश्यक पूर्वाधार विकासले यस क्षेत्रको समग्र आर्थिक विकासमा महत्वपूर्ण योगदान पुग्ने बताउनुभयो । उहाँका अनुसार भन्सार सञ्चालनसँगै सडक, गोदाम, सुरक्षा तथा अन्य पूर्वाधार विस्तारका कामलाई समेत प्राथमिकता दिइनेछ ।
स्थानीयवासीले छोटी भन्सार पुनः सञ्चालनको निर्णयलाई “नरैनापुरको आर्थिक भविष्यसँग जोडिएको ऐतिहासिक कदम” का रूपमा हेरेका छन् ।
