बाँके । सङ्घीय अस्पतालको रूपमा रहेको भेरी अस्पतालमा बिरामीको चापअनुसार कर्मचारी नहुँदा व्यवस्थापनमा समस्या हुँदै आएको छ । भेरी अस्पतालमा अहिले दैनिक एक हजार सात सय हाराहारी बिरामी बहिरङ्ग सेवामा आउने गर्दछन् ।
बाँके सहित लुम्बिनी, कर्णाली र सुदूरपश्चिम प्रदेशका बिरामीको उपचार नियमित गर्ने गरेको भेरी अस्पतालमा नेपाल स्वीकृत दरबन्दी १ सय ४७ जनाको भए पनि ८४ जना मात्र कर्मचारी रहेकोले स्वास्थ्य मन्त्रालयको मापदण्ड अनुसार स्वास्थ्य सेवा प्रवाह गर्न नसकेको अस्पतालका प्रमुख (मेडिकल सुपरिन्टेन्डेन्ट) डाक्टर पवन जङ्ग रायमाझीले बताउनुभयो ।
अस्पताल विकास समितिका चिकित्सक र स्वास्थ्यकर्मीको भरमा अस्पताल सञ्चालन हुँदै आएको रायमाझिले बताउनुभयो । भेरी अस्पतालको दरबन्दी लिएर १३ जना तिकित्सकहरु अन्यत्र काम गरीरहेकाले मन्त्रालयले ती चिकित्सकहरूलाई अस्पतालमा फिर्ता पठाउने वातावरण मिलाउन जरुरी रहेको उहाँले बताउनुभयो ।
अस्पताल विकास समितिका सदस्य डा।डक्ट प्रसाद धितालका अनुसार , १३ जना काज लिएर अन्यत्र काम गरिरहेको र १९ जना चिकित्सकको दरबन्दी अझै खाली रहेको बताउनु भयो । उहाँले खाली रहेको दरबन्दी पूर्तिका लागि अस्पताल विकास समिति लागि परे पनि स्वास्थ्य मन्त्रालयको बेवास्ताका कारण दरबन्दी पूर्ति हुन नसकेकोले स्वास्थ्य जस्तो महत्वपूर्ण सेवा प्रवाह हुन नसक्दा जनतामा निराशा उत्पन्न भएको बताउनुभयो ।
स्वीकृत दरबन्दी अनुसार कर्मचारी नहुँदा करारमा ७४ जना, दरबन्दी बाहेकका २३ जना अन्य थप कर्मचारी नियुक्त गरी अस्पताललाई सञ्चालन गरी रहेको सदस्य धितालले जानकारी दिनुभयो । उहाँले भन्नुभयो, सुरक्षाकर्मी र गार्डको सङ्ख्या १ सय १ रहेको छ भने जम्मा २ सय ६३ जनालाई अस्पताले कर्मचारीको रुपमा परिचालन गरेको बताउनुभयो ।
सेवाको दृष्टिकोणले सरकारको मूल्याङ्कन अनुसार भेरी अस्पताल अन्य संघीय अस्पतालहरूमा भन्दा उत्कृष्ट भएको बताउँदै अस्पताल प्रमुख रायमाझीले भन्नुभयो गत ९ महिनामा अस्पतालले २ लाख भन्दा बढी बिरामीहरूलाई सेवा दिएको छ जसमा इमेर्जिन्सीमा करिब २८ हजार भन्दा बढीले सेवा लिएका छन् भने तीन हजार भन्दा बढी शल्यक्रिया भएको छ । यस्तै ५ हजार ५ सय भन्दा बढीले प्रसूति सेवा लिएको बताउनुभयो ।
उहाँले बाँकेको स्थानीयहरू सबै भन्दा बढी नेपालगन्ज उपमहानगरपालिकाबाट ५० हजार, कोहलपुर नगरपालिकाबाट ११ हजार, खजुरा गाउँपालिकाबाट ११ हजार, राप्तिसोनारी गाउँपालिकाबाट ८ हजार, बैजनाथ गाउँपालिकाबाट ७ हजार, डुडुवा गाउँपालिकाबाट ६ हजार, जानकी गाउँपालिकाबाट ५ हजार र नरैनापुर गाउँपालिकाबाट १ हजार ६ सय जान बिरामीहरूले ९ महिना यता सेवा लिएको भेरी अस्पतालको तथ्याङ्कमा उल्लेख जानकारी गराउनु भएको थियो ।
