बाँके । आसन्न प्रतिनिधिसभा निर्वाचनलाई लक्षित गर्दै बाँकेको तिनै निर्वाचन क्षेत्रका मतदान केन्द्रमा खटाइएका कर्मचारीहरूले निर्वाचन सामग्री बुझेर कार्यस्थलतर्फ प्रस्थान गरेका छन्।
मुख्य निर्वाचन अधिकृतको कार्यालय नेपालगन्जका मुख्य निर्वाचन अधिकृत दिपक कुमार दाहालले तिनै निर्वाचन अधिकृतको कार्यालयबाट सोमबार मतदान अधिकृतहरूलाई आवश्यक निर्वाचन सामग्री हस्तान्तरण गरिएको जानकारी दिनुभयो।
उहाँका अनुसार सामग्री बुझेका कर्मचारीहरू सम्बन्धित मतदान केन्द्रमा पुगेर आजैबाट आवश्यक तयारी तथा व्यवस्थापनका काम प्रारम्भ गर्नेछन् । मतदानलाई व्यवस्थित, निष्पक्ष र विश्वसनीय बनाउन सम्पूर्ण कर्मचारीलाई आवश्यक निर्देशन समेत दिइएको जनाइएको छ ।
जिल्लामा तीन वटा निर्वाचन क्षेत्र रहेका छन्। ती अन्तर्गत १३९ मतदानस्थल र ४०० मतदान केन्द्र निर्धारण गरिएको छ ।
बाँकेमा कुल ३ लाख ५० हजार ३७१ मतदाता रहेका छन्। जसमध्ये १ लाख ७२ हजार २२३ महिला, १ लाख ७८ हजार ३३९ पुरुष तथा ९ जना अन्य मतदाता रहेका छन्।
निर्वाचन नजिकिँदै जाँदा जिल्लाभर चुनावी सरगर्मी बढ्दै गएको छ भने प्रशासन र निर्वाचन संयन्त्रले शान्तिपूर्ण र भयरहित वातावरणमा मतदान सम्पन्न गराउने तयारीलाई तीव्रता दिएको छ।
