बाँके । आइतबार देखि लगातार परेको पानीले थनकाउन लागेको धानबालीमा ठूलो क्षति पुर्याएको छ ।
एकदुई दिनमै धान भित्र्याउने बेलामा वर्षाले धानबाली नष्ट गरेपछि किसानहरु वर्ष दिनसम्म के खाने भन्ने चिन्तामा डुबेका छन् ।
उत्तरतर्फ सरिरहेको मौसमी प्रभावले देशका सुदूरपश्चिम, कर्णाली र गण्डकीमा केही अधिक र अन्य प्रदेशका केही स्थानमा सामान्य वर्षा भइरहेको मौसम पूर्वानुमान महाशाखाले जनाएको छ ।
बाँकेमा आइतबार रातिदेखि निरन्तर परेको पानीसँगैको हावाहुरीले धानबाली ढालेको छ ।
यस्तै, रुपन्देहीको सैनामैना नगरपालिका वडा नं १ स्थित चेथरीमा पनि आइतबारदेखि निरन्तर परेको पानी र हावाले धानबालीमा नोक्सानी पुर्याएको छ ।
यस्तै नेपालको पश्चिम क्षेत्र डडेल्धुरामा गत २४ घण्टामा १ सय ७९ लिटर मिलिमिटर वर्षा भइसकेको छ । त्यहाँ पनि धानबालीमा ठूलो क्षती भएको जनाइएको छ ।
उता, कञ्चनपुरको शुक्लाफाँटा नगरपालिक–१, वन्साहमा लगातारको वर्षाले धानबाली बगाएको छ । खेतमा काटेको धानबाली पानीले बगाउँदा किसानले क्षति व्यहोरेका छन् ।
दशैं सकिएलगत्तै धेरैजसो किसानले धान काट्ने तयारी गर्दै थिए भने केही किसानले धान काटिसकेका थिए । काटेको र पाकेको दुवै धानमा वर्षाले नोक्सानी पुर्याएको हो ।
